РФ патрэбныя жаўнеры «на паўгода вайны на чужой тэрыторыі». Рыхтуецца заканадаўчая база
Міністэрства абароны РФ размясціла на федэральным партале праектаў нарматыўных актаў праект зменаў у закон «Пра вайсковы абавязак і вайсковую службу».
Восень 1999 года. Наступ расійскіх войск у Чачню.
Змены дазволяць заключаць кантракты на паўгады службы, у тым ліку «для выканання задач па спыненні міжнароднай тэрарыстычнай дзейнасці па-за межамі тэрыторыі Расійскай Федэрацыі».
Плануецца, што такімі кантрактнікамі на паўгода-год змогуць стаць і рэзэрвісты і жаўнеры тэрміновай службы.
Плануецца, што праект пачне дзейнічаць у жніўні 2016 года.
«Кантракты на паўгода баявых дзеянняў шырока практыкаваліся ў пачатку другой чачэнскай кампаніі. У нашым батальёне ўсе кантрактнікі былі выключна паўгадычнікамі», — піша ў сваім блозе расійскі незалежны вайсковы назіральнік Дзяніс Макрушын, які ваяваў у Чачні.
Перад штурмам Грознага, калі падыходзіў час звальнення прызыву I-98, увесь прызыў 1998-га года прымушалі падпісваць фіктыўныя кантракты на паўгоды баявых дзеянняў, каб хоць неяк захаваць баяздольную аснову перад рашучымі дзеяннямі, распавядае Макрушын.
«Чамусьці мне падаецца, што у бліжэйшы час нас чакаюць вельмі «вясёлыя» часы, грамадзяне», — заключае назіральнік, які ў 2008-2010 годзе таксама служыў на акупаванай тэрыторыі Грузіі і ў цэлым падтрымлівае агрэсію супраць Украіны.
