У адрозненне ад Ірана, Расія не настойвае на захаванні Асада
У адрозненне ад Ірана, Расія не настойвае на тым, каб Башар Асад застаўся кіраўніком Сірыі. Пра гэта са спасылкай на дыпламатычныя крыніцы паведамляе агенцтва Ройтэрз. Гэта адрознівае пазіцыі Масквы і Тэгерана. Іран не дапускае магчымасці сыходу Асада.
Дыпламатычныя перамовы па пытанні Сірыі працягваюцца ў Вене (Аўстрыя).
Як пішуць сусветныя СМІ, уплыў расійскай ваеннай аперацыі ў Сірыі пакуль нязначны, змяніць баланс сілаў Асаду не ўдалося. Урадавыя войскі здолелі заняць некалькі вёсак і некалькі кавалкаў аўтадарогі, што злучае Дамаск з Алепа, але не больш за тое.
Намеснік расійскага міністра абароны Анатоль Антонаў паведаміў, што тэрміны правядзення Расеяй ваеннай аперацыі ў Сірыі абмежаваныя тэрмінам наступлення арміі Сірыі, перадае РІА «Навіны».
«Аперацыя абмежаваная тэрмінам правядзення сірыйскімі войскамі наступальных дзеянняў супраць тэрарыстаў», — сказаў Антонаў на трэцяй нарадзе міністраў абароны краін АСЕАН.