Васьмікласнік «замініраваў» барысаўскую школу: былі эвакуяваныя 300 чалавек
Вечарам 18 снежня, каля 18:00, у РУУС Барысава патэлефанавала намеснік дырэктара школы №16 па вуліцы Шпітальнай, 36 і паведаміла, што ў фае знойдзена запіска з паведамленнем аб закладзенай выбуховай прыладзе.
Работнікамі МНС і адміністрацыяй аб'екта з будынка былі эвакуяваныя больш за 300 чалавек. Заняткі ў школе былі прыпынены. Пасля праведзенага абследавання выбухованебяспечных прадметаў не знойдзена.
«Устаноўлена, што запіску напісаў навучэнец 8-га класа названай школы, які пасля правядзення следчых дзеянняў перададзены бацькам пад распіску», — распавяла афіцыйны прадстаўнік УСК па Мінскай вобласці Таццяна Беланог.
Праверку па факце здарэння праводзіць Барысаўскі раённы аддзел Следчага камітэта. Паводле яе вынікаў будзе прынята працэсуальнае рашэнне (аб завядзенні крымінальнай справы).
