Сузаснавальнік Apple назваў гараж Стыва Джобса міфам
Стыў Возняк, адна з ключавых фігур кампаніі Apple, распавёў у інтэрв'ю Bloomberg Businessweek аб тым, што асноўная частка першых распрацовак Apple адбывалася не ў легендарным гаражы Джобса.
Стыў Возняк і Стыў Джобс працуюць над Apple I
У гісторыі Apple гараж Стыва Джобса займае важнае месца. Мяркуецца, што менавіта там быў створаны Apple I, першы камп'ютар кампаніі, сабраны рукамі яе піянераў у 50 экзэмплярах.
«Гараж — часткова міф. Мы не распрацоўвалі там дызайн, не стваралі макеты, не планавалі прадукты. Вытворчасць праходзіла таксама не там», — распавядае Возняк.
«Гараж не меў важнай ролі, акрамя той, што там мы маглі адчуваць сябе як дома».
Паводле яго слоў, асноўная частка работы адбывалася на яго рабочым месцы ў кампаніі Hewlett-Packard.
Дом Стыва Джобса
Дом Стыва Джобса, што знаходзіцца ў Лос-Альтасе, Каліфорнія, разам з гаражом прызнаны гістарычным помнікам. Улады будуць даглядаць дом і захоўваць яго ў тым стане, у якім ён быў пры Джобсе.
Зараз у доме пражывае другая жонка Джобса, Мэрылін Джобс.
Apple I у самаробным корпусе
Apple I быў рэвалюцыйным прадуктам для 1976 года. Ён па многіх параметрах апярэджваў галоўнага канкурэнта Altair 8800. У адрозненне ад большасці камп'ютараў свайго часу, ён прадаваўся практычна цалкам сабраным.
Камерцыйны поспех прынес яго нашчадак Apple ][ 1977 года, які мала чым адрозніваўся ад першай мадэлі ў задуме і «жалезе», але стаў серыйнай мадэллю, гатовай да выкарыстання «простымі смяротнымі». Розныя мадыфікацыі Apple ][ вырабляліся да 1995 года.
Стыў Возняк канчаткова сыйшоў з Apple ў 1987 годзе. Ён дагэтуль лічыцца супрацоўнікам кампаніі, валодае акцыямі і атрымлівае заробак. Зараз вядзе выкладчыцкую дзейнасць, распрацоўваў некалькі ўласных праектаў. Час ад часу крытыкуе хібы ў новых прадуктах Apple.
