У Мінску сёння пройдзе дабрачынная акцыя «Мы любім украінскі боршч»
У Мінску сёння, 9 верасня, пройдзе дабрачынная акцыя «Мы любім украінскі боршч», галоўная мэта якой – сабраць і перадаць сродкі для ўкраінскіх параненых.
Падчас мерапрыемства яго ўдзельнікам прапануюць пакаштаваць украінскага баршчу, прыгатаванага беларускай рэжысёркай Вольгай Нікалайчык, якая з’яўляецца адной з арганізатарак.
Вольга адзначыла, што часам украінскім параненым, якіх зараз вельмі шмат, бракуе элементарных аптэчак, сродкаў для спынення страты крыві. Менавіта на гэта і будзе скіраваны збор ахвяраванняў падчас акцыі.
Паводле Вольгі Нікалайчык, увесну на падобнай акцыі было сабрана каля 500 даляраў, якія пайшлі на патрэбы параненых актывістаў Майдану.
На акцыю 9 верасня плануецца запрасіць паэтаў, актораў, музыкаў, грамадскіх дзеячоў. «Гэта не будзе канцэрт, хоць там і будуць спевы, вершы. Гэта будзе імпрэза, падчас якой мы будзем абмяркоўваць сітуацыю ва Украіне, збіраць ахвяраванні і частаваць украінскі боршч. Запрашаем усіх добрых людзей», — падкрэсліла рэжысёр.
Акцыя пачнецца 9 верасня а 18:00 па адрасе Чарнышэўскага, 3а (сядзіба БНФ).