Гаворыць Скрыплеў: з чаго чалавек пайшоўшы
Васіль Грынь жыве на хутары Скрыплеў у Валожынскім раёне. Ягоная аграсядзіба «Засценак Скрыплеў» прымае турыстаў. А Васіль запісвае (на дыялекце) размовы гасцей з Мінска і Масквы. а таксама свае размовы з жыхарамі Скрыплева і суседняй вёскі Гародзькі. Гэта трэба чуць.
— Вот скажы… якія ты маіш варыянты?
— Якія?
— Ну вот… з чаго пайшоўшы быў чалавек?
— Ты скажы.
— Я скажу… я скажу што ніяк ні з абізяны! ну вот такая навука, такая навука! на во табе малпу — зрабі з яе чалавека! хера! ну.. дык чаго даказваць!? а я магу сказаць, што з мядзведзя! дык той жа мядзведзь і на матацыклеці можа — чым за малпу горшы!?
— Дык з чаго чалавек пайшоўшы?
— А вот і я думаю… А былі ж яшчэ такія лабатыя, брывастыя… дык падохлі ўсе… але ж гэта ні людзі! а яны баяць… кніжнікі.. зразу быў кампот, а потым бабухнула нешта… і а-я-я як мы зажылі… а нехта ж гэта ўсё падзарваў! і ў мяне, 'крамя Бога, нічога ні выходзя.