В Радошковичах 350 домов; из них 100 «богатых» и 250 бедных… О чем писала «НН» 110 и 10 лет назад
У Радашковічах 350 дамоў; з іх 100 «багатых» і 250 бедных. Я сказаў «багатых», але гэта не значыць, быццам яны мелі тысячы: у беларусаў кожнага, хто заўсягды мае яду, сыты, называюць «багатыром», а бедным лічыцца такі, што сягоння з’еў, ды не ведае, ці будзе што есці заўтра.
«НН». №1. 1908
Прадпрымальнікі дэманстравалі на праспекце і плошчы Незалежнасці. Колькасць пратэстоўцаў дасягала 5000 чалавек.
Акцыя за адмену ўказа Лукашэнкі №760, які забараняе прадпрымальнікам мець наёмных рабочых, пачалася а 12 гадзіне на Кастрычніцкай плошчы. На пляцы незадоўга перад мітынгам быў заліты каток, дзе праходзілі нейкія гулянні для школьнікаў пад эгідай БРСМ. Коўзанка займала большую частку плошчы, таму мітынгоўцам было цеснавата.
Намеснік начальніка галоўнага ўпраўлення ўнутраных спраў Менгарвыканкама Аляксандр Найдзенка паведаміў, што па факце несанкцыянаваных вулічных маніфестацыяў распачатая крымінальная справа.
Ніхто не чакаў, што акцыя 10 студзеня будзе настолькі масавай і рашучай і што да прадпрымальнікаў далучыцца столькі людзей на вуліцах.
«НН». 10 студзеня 2008
