«Pradam ajfon, nie spadabaŭsia koler». Na «Kufry» pierapradajuć navahodnija padarunki
Zrazumieć, ź jakimi padarunkami na Novy hod biełarusy pamylalisia čaściej za ŭsio, davoli prosta — dastatkova pahladzieć prapanovy na «Kufry». Pieršyja abjavy ab prodažy navahodnich prezientaŭ źjavilisia jašče pry kancy śniežnia.
Dziciačaje adzieńnie i cacki
Najčaściej za ŭsio sustrakajucca abjavy ab prodažy rečaŭ dla samych maleńkich — adzieńnia ci cacak na ŭzrost da troch hadoŭ. Pryčyna prodažu sukienak ci navat kambiniezonaŭ zvyčajna prostaja — nie padyšoŭ pamier. Ale niekatoryja mamy ščyra pišuć, što reč nu zusim nie ŭ tym styli, jaki siamja zvyčajna abiraje dla dziciaci.
Jość i davoli ekzatyčnyja varyjanty: naprykład, u adnoj z abjaŭ pradajuć futra z naturalnaha piasca dla čatyrochhadovaj dziaŭčynki.
U vypadku z cackami paznačajuć, što vystavili na prodaž, bo dzicia nie zacikaviłasia padarunkam ci tamu što doma ŭžo jość niešta padobnaje: «Nabor doktara. Kuplała dla dački na Novy hod, ale śviakroŭ padaryła taki samy raniej. Tamu praź niepatrebnaść pradaju».
Byvaje, što toj, chto robić padarunak, nie raźbirajecca ŭ tym, jakija cacki dla jakoha ŭzrostu padychodziać: «Novy zajka. Padaryli, ale nam užo 2 hady i z takim nie hulajemsia. Padydzie z 6 miesiacaŭ».
Hadžety
Hadžety ŭ śpisie padarunkaŭ, jakija nie spadabalisia, zajmajuć hanarovaje druhoje miesca. U hetym vypadku navat dramy možna pabačyć u apisańni tavaru. Naprykład: «Novyja biespravadnyja navušniki. Kuplała na «Vajłdbierys» dla syna na padarunak da Novaha hoda. Ale jamu na pracy padaryli navušniki kłasam vyšejšyja za hetyja».
«Pradam dobry telefon, byŭ padorany na Novy hod, ale, na žal, žadaju inšuju madel. Byŭ nabyty 20.12.2023», − rasčaravańnie čałavieka adčuvajecca navat praz manitor.
Skrynšot sajta kufar.by
«Pradam absalutna novy smart-hadzińnik. Nabyty ŭ «5 elemiencie». Hod harantyi. Sama karystajusia takim samym. Syn nie viedaŭ i padaryŭ. Vielmi kłasny. Ź viasny karystajusia, narakańniaŭ nie było», — ščyra raspaviadaje žančyna ŭ apisańni tavaru.
Kali vy dumajecie, što nie spadabacca moža tolki niejki tanny hadžet, to vy vielmi pamylajeciesia. I vystaŭleny na prodaž Xbox tamu paćviardžeńnie: «Novy Xbox Series S z dvuma džojścikami. Byŭ padorany na Novy hod, ale nie maju patreby ŭ im. U kamplekcie jašče padpiska na 3 miesiacy».
Ajfon, darečy, taksama moža rasčaravać: «iPhone 13, 128 Hb, nie aktyvavany, padaryli, ale koler nie spadabaŭsia».
Technika dla pryhažości
Hałoŭnaja vysnova, jakuju možna zrabić, prahladajučy abjavy ŭ hetaj rubrycy «Kufra»: pierad tym, jak padaryć jaki-niebudź bjuci-hadžet, nieabchodna spytacca ŭ čałavieka, ci patrebny jon. Bo situacyi mohuć być kurjoznyja i navat kryŭdnyja.
«Pradam trymier dla nosa. Absalutna novy. Padaryli, ale ja takoj technikaj nie karystajusia. Dobry padarunak dla mužčyny z puchnatym nosam», — adznačaje adzin z pradaŭcoŭ.
Skrynšot sajta kufar.by
«Pradam novy vypramnik dla vałasoŭ. Padaryła siamja na Novy hod, ale karystacca mnie im nielha z-za roznych pracedur dla vałasoŭ», — paviedamlaje jašče adna dziaŭčyna. Inšaja sprabuje pradać novuju płojku, bo atrymała padarunak paśla taho, jak zrabiła chimičnuju zaviŭku.
Kaśmietyka i parfumieryja
Pamylicca ŭ hetaj śfiery vielmi prosta: «Clarins lip perfector. Padaryli na Novy hod, nie majo adcieńnie! Mnohim vielmi padabajecca hety blask! Adzin raz mazała na vusny», «Krem antyŭzrostavy. Padaryli. Firma taja, jakuju chacieła, a ŭzrost starejšy, čym treba mnie».
Navat kali vy viedajecie, jakimi srodkami karystajecca vaša siabroŭka, heta nie harantuje, što atrymajecca jaje paradavać: «Vydatnaja pamada i balzam dla vusnaŭ. Biaru nie pieršy raz. U mianie ŭžo jość dva nabory, siabroŭka na Novy hod padaryła treci. Mnie stolki nie treba, nie paśpieju vykarystać da kanca terminu prydatnaści».
Mužčynam dahadzić taksama składana, asabliva kali havorka idzie pra parfumu: «Parfuma Tom Ford Noir. Novaja, dva razy tolki pšyknuli. Padaryli na Novy hod, ale pach nie moj, nie spadabaŭsia». Žančyny prydumvajuć svaje schiemy, jak atrymać u vyniku lubimyja duchi: «Calvin Klein parfumiernaja vada 50 mł. Zrabiła 10 pšykaŭ, nie moj vodar. Padaryli na Novy hod, ale vyrašyła pradać i kupić sabie bolš prydatnyja».
Juvielirnyja ŭpryhožvańni
Pryčyny raźvitacca ź juvielirkaj mohuć być roznyja: «Pradam piarścionak źmiejka, pamier 16. Novy, nie byŭ u vykarystańni. Padaryli, ale, na žal, nie padyšoŭ pa pamiery. Nabyli ŭ kramie «7 karat» napiaredadni Novaha hoda», «Zavušnicy ź fijanitami. Padaryli, nie maja zašpilka, nie nasilisia, tolki prymiarała. Jość padarunkavaja skrynačka».
Skrynšot sajta kufar.by
A chtości moža być prosta nie fanatkaj niejkaha brendu — i jak vynik, na «Kufar» traplaje branzalet Pandora.
Rečy dla ŭtulnaści
Jość tyja, chto atrymaŭ darahi, ale niepatrebny padarunak na karparatyvie. A kali muž i žonka razam pracujuć u adnoj kampanii, to niaŭdałych padarunkaŭ budzie niekalki: «Pradam dva bijakaminy, u čornym i biełym kolery. Padaryli na karparatyvie, a ŭ nas doma ŭstanoŭleny kamin».
Niedzie pamiž abjaŭ na «Kufry» schavaŭsia i interjerny aleń, jaki śviecicca. «Padaryli, a ŭ nas taki samy jość», — tłumačyć pradaviec.
Niešta dla aŭto
Cikava, čym kiravaŭsia čałaviek, jaki padaryŭ na Novy hod aŭtamabilny akumulatar na bienzinavuju mašynu — usio ž taki nie samy ŭniviersalny varyjant. Ale toj, chto atrymaŭ prezient, ciapier pradaje jaho «za niepatrebnaściu».
Skrynšot sajta kufar.by
Padarunki dla doma
Siarod niaŭdałych padarunkaŭ, vystaŭlenych na prodaž, možna znajści i nie vielmi zvyčajnyja rečy. Naprykład, štory. Zdavałasia b, ich možna daryć, tolki abhavaryŭšy ŭsie niuansy zahadzia. Ale i tut byvajuć prablemy: «Padaryli na Novy hod, nie padyšli pa kolery. Tkanina aksamit. Koler pylnaja ruža. Štory novyja, biez defiektaŭ. Nitki nie tyrčać, akuratny pašyŭ».
Skrynšot sajta kufar.by
Darečy, cikavaja situacyja atrymlivajecca: z adnaho boku, biełarusy pakul nie hatovyja daryć padarunak razam z čekam, jak pryniata ŭ niekatorych krainach na Zachadzie (u hetym vypadku prezient lohka viarnuć u kramu), ź inšaha — užo aktyŭna pierapradajuć toje, što nie spadabałasia.
Čytajcie taksama:
U Biełarusi zapracavaŭ novy servis anłajn-braniravańnia hatelaŭ
