Što za Dissidentby? Raskazvajem pra inicyjatyvu, jakaja napramuju dapamahaje 465 palitviaźniam
Praz apošnija padziei davier biełarusaŭ da fondaŭ dapamohi trochi źmienšyŭsia: chtości nie vieryć im praz skandały i źlivy, chtości baicca źviarnucca, bo paśla SK zabłakuje atrymanyja srodki, chtości, moža, i chacieŭ by paprasić dapamohi, ale nie adpaviadaje patrabavańniam fonda. Ale ž inicyjatyva «Dysident» pracuje trochi pa-inšamu. Zasnavalniki płatformy Viačka i Maryna Kasinieravy, jakija ciapier žyvuć u Polščy, raspaviali «Našaj Nivie», jak jašče možna dapamahčy tym, chto paciarpieŭ ad represij.
Maryna i Viačka Kasinieravy
«Raniej my zaŭsiody dapamahali asudžanym asabista: pieravodzili hrošy «na atavarku», źbirali pieradačy, jeździli da siemjaŭ. Čaściej za ŭsio, heta byli našyja znajomyja, siabry ci paplečniki pa ruchu.
Ale časam ludzi zastavalisia amal zusim biez dapamohi, asabliva kali čałavieka nie chacieli pryznavać palityčnym źniavolenym. — raskazvajuć Kasinieravy. — My vyrašyli sami hetym zajmacca ŭžo bolš sistematyčna.
Jak pracuje płatforma dissidentby.com? Usio prosta: na sajcie isnuje śpis palitviaźniaŭ. Chtości ź ich čakaje suda, chtości ŭžo asudžany. Niekatoryja asoby vielmi viadomyja (Aŭtuchovič, Palčys, Babaryka), niekatoryja prajšli pa-za ŭvahaj ŚMI. Kali jość infarmacyja, to paznačanyja data naradžeńnia čałavieka, adras dla listavańnia. Možna dasłać źniavolenamu list ci paštoŭku albo «stać zachavalnikam»: heta značyć, dapamahać kamuści ź viaźniaŭ rehularna. Palitviaźni, jakija ŭžo majuć «zachvalnikaŭ», paznačanyja admysłova — kala proźvišča haryć značok z rukami ŭ formie sardečka.
«Kali čałaviek hatovy stać «zachvalnikam», my sprabujem źviazać jaho napramki sa svajakami taho viaźnia, jakomu jon vyrašyŭ dapamahać. I paśla jany ŭžo na kantakcie adno z adnym, biez našaha ŭdziełu», — tłumačać Kasinieravy.
Taksama možna dapamahčy hrašyma samomu źniavolenamu ci jaho siamji. Dla hetaha možna pieraličyć hrošy viaźniu «na atavarku», rekvizity rachunkaŭ SIZA paznačanyja na sajcie. Dla dapamohi siamji palitviaźnia možna pieravieści hrošy kankretna na kartku jaho svajakoŭ.
U bazie «Dysidenta» 465 čałaviek, jakija znachodziacca za kratami pa palityčnych matyvach. Heta bolš, čym u toj ža «Viasny», pavodle padlikaŭ jakoj status palitviaźnia majuć 290 čałaviek.
«Čamuści ŭ mnohich vypadkach, kali ŭ spravie fihurujuć hvałtoŭnyja dziejańni, navat kali čałaviek abaraniaŭ siabie, to jaho nie chočuć pryznavać palitviaźniem našyja pravaabaroncy, — kažuć Kasinieravy. — Časam da nas źviartajucca svajaki ludziej, jakija nie razumiejuć, čamu im admaŭlajuć u dapamozie. Naprykład, niadaŭna ž asudzili niekalki čałaviek na terminy ad 2 da 6 hadoŭ. Ich zatrymali za paškodžańnie mašyny žonki milicyjanta. Ale paśla zatrymańnia mocna źbivali, zalivali vočy z bałona… Katavali».
«Dysident» dapamahaje pieraličvać hrošy i takim viaźniam.
«Z fondaŭ stasujemsia chiba tolki z «Bajsołam»: my zmahli ich pierakanać, što chapaje ludziej, jakich nie pryznali palitviaźniami, ale jakim treba dapamoha. Ciapier časam pieradajem im kantakty niekatorych viaźniaŭ, «Bajsoł» padtrymlivaje ich», — kažuć Kasinieravy.
Skrynšot z sajta dissidentby.com
«Važny momant: «Dysident» — heta decentralizavanaja inicyjatyva. My zasnavalniki prajektu, ale nie kiraŭniki, nie načalniki, u nas niama niejkaj rady. Jość vałanciory, jakija dapamahajuć, jość šmat ludziej jakija dapamahajuć adno adnamu praz našu płatformu. Hrošy iduć niepasredna ad ludziej ludziam, my ich nie raźmiarkoŭvajem, nijaki pracent sabie nie biarem. Navat niadaŭna my zaviali «Patreon» prajekta, dyk dapamoha niepasredna nam paznačanaja asobna. Hrošy, jakija pieraličvajuć na prajekt — iduć tolki na prajekt. Tamu kab zarabić na žyćcio my paralelna pracujem: Maryna addalena, a ja voś nieŭzabavie vychodžu na zvyčajnuju pracu kurjeram», — kaža Viačka Kasinieraŭ.
Simvał «Dysidenta» — čyrvony trochkutnik. Čamu?
Sistema vinkielej (niam.: Winkel-kut) pieršapačatkova vykarystoŭvałasia ŭ kancentracyjnych łahierach nacysckaj Hiermanii. Trykutniki z materyi roznaha koleru našyvalisia zvyčajna na levy bok hrudziej, časam na rukaŭ. Trykutnikam čyrvonaha koleru paznačaŭsia asudžany za palityku: anarchist, kamunist, libierał. Ciapier ža, adznačajuć Kasinieravy, biełaruskaja pienitencyjarnaja sistema viarnułasia da paznačeńnia asudžanych roznakalarovami birkami (anarchisty nosiać žoŭtyja birki, asudžanyja za narkotyki — zialonyja). Hetaja sistema birak u kałonijach — vielmi tryvožny sihnał, ličać Maryna i Viačka.
