22-hadovaj žycharcy Viciebska, jakaja ŭdaryła pa milicejskim aŭto, pavinny byli vynieści prysud. Ale sud vyrašyŭ raźbiracca dalej
Sud Kastryčnickaha rajona Viciebska 22 lutaha pavinien byŭ vynieści prysud Julii Kašavieravaj — 22-hadovaj byłoj miedsiastry desantnaj bryhady, jakuju abvinavačvajuć u tym, što na vuličnym maršy pratestu ŭ kastryčniku jana paškodziła milicejski bus i sarvała kiepku i masku z amapaŭca. Adnak sudździa Siarhiej Budrevič abviaściŭ, što sudovaje śledstva adnaŭlajecca, piša Tut.by.
Sudździa rastłumačyŭ, što na pracesie paŭtorna vyvučać adzin ź videazapisaŭ, a taksama pakazańni Julii Kašavieravaj, jakija jana dała na papiarednim śledstvie — «z pryčyny istotnych supiarečnaściaŭ».
Juliju Kašavieravu abvinavačvajuć u złosnym chulihanstvie (č.2 art. Na pasiadžeńni 19 lutaha prakuror Uładzimir Łabacki zapatrabavaŭ dla Julii 6 hadoŭ kałonii ahulnaha režymu.
Pavodle źviestak śledstva, 4 kastryčnika dziaŭčyna išła ŭ kałonie pa horadzie. Kala doma № 74 na Maskoŭskim praśpiekcie da pratestoŭcaŭ padjechała milicyja. Adnaho z mužčyn zatrymali. Udzielnikaŭ šeścia heta aburyła, jany sprabavali adbić čałavieka. U adkaz siłaviki ŭžyli haz z bałončyka.
Padčas sutyčki ź milicyjaj Kašavierava, jak śćviardžaje śledstva, paškodziła mikraaŭtobus Ford Transit, jaki naležyć UUS abłvykankama: «Udaryła pa im nahoj nie mienš za try razy, naniosšy ŭvahnutaść i drapiny, a taksama kinuła ŭśled draŭlanuju pałku».
Milicyi rehijona naniesieny ŭron na 841 rubiel, zajaviŭ dziaržabvinavaŭca. Raniej, darečy, siłaviki paviedamlali ab 405 rublach škody. Hetuju sumu siamja dziaŭčyny ŭžo kampiensavała.
Akramia taho, pavodle śledstva, Kašavierava sarvała miedycynskuju masku i formiennuju kiepku z kamandzira źviana AMAPa Alaksieja Alchimoviča.
Julija častkova pryznała siabie vinavataj.
