«My zasakrečanyja». U Hrodnie ŭ sudzie amapaŭcy zamiest svaich adrasoŭ nazyvali źviestki aktyvistaŭ
U Hrodnie praciahvajecca razhlad kryminalnaj spravy ŭ dačynieńni da piaci hrodziencaŭ, jakija abvinavačvajucca pa artykule 342 KK RB «Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich», a taksama ŭ hvałcie nad siłavikami. Paciarpiełyja — 11 supracoŭnikaŭ milicyi. U paniadziełak, 15 lutaha, dapytvali troch ź ich. Pry hetym amapaŭcy na sudzie zamiest svajho adrasu pražyvańnia čamuści nazyvali adrasy hrodzienskich aktyvistaŭ, piša Tut.by.
Fota Raman Jurhiel, harodniaspring.org
Sprava razhladajecca ŭ sudzie Leninskaha rajona Hrodna. Ź piaci abvinavačanych na łavie padsudnych zastałosia čatyry čałavieki — braty Uładzimir i Juryj Sidzianieŭskija, siostry Žanna Zacharevič i Nadzieja Ściapancava.
Alaksandr Jakuboŭski źnik — ciapier abvieščany ŭ vyšuk.
Sprava tyčycca akcyi pratestu, jakaja prachodziła 6 vieraśnia. Tady haradziency vyjšli na vulicu ŭ niekalkich miescach. Byli sutyčki z AMAPam na vulicy Harnavych i kala ŭniviersama «Brest». Pa hetych epizodach i abvinavačvajucca piać čałaviek.
U paniadziełak dapytvali paciarpiełych supracoŭnikaŭ AMAPa. Pieršym vystupaŭ «Viktar Dmuchoŭski». Svaim chatnim adrasam jon nazvaŭ miesca prapiski hrodzienskaha aktyvista Eduarda Dmuchoŭskaha. Na pytańnie, čamu ŭ aficyjnych dakumientach jon ukazvaje hetyja źviestki, amapaviec adkazaŭ, što pryjšło ŭ hałavu — i nazvaŭ».
Padčas dačy pakazańniaŭ supracoŭnik znachodziŭsia za dźviaryma. Raspaviadaŭ, što ludzi 6 vieraśnia na vulicy Harnavych vykrykvali antyŭradavyja łozunhi, potym stali ŭ sčepku, šturchalisia i sprabavali sarvać ź siłavikoŭ maski. Asabista jon zatrymaŭ troch ci čatyroch čałaviek. Adnak toje, što mienavita adna z abvinavačanych zryvała ź jaho bałakłavu, jon dakładna skazać nie zmoh. Druhuju abvinavačvanuju jon nie pamiataje. Na jaho tvary zastałasia drapina, była parvanaja bałakłava. U balnicu jon nie źviartaŭsia, na balničnym nie byŭ.
Taksama vysłuchali jašče dvuch paciarpiełych amapaŭcaŭ. Ich imiony źmienieny: heta «Bazylevič» i «Miańko».
Pry hetym «Juryja Bazyleviča «na vulicy Harnavych nie było, jon znachodziŭsia kala ŭniviersama «Brest». Tam taksama «ludzi stajali ŭ sčepcy, išli na supracoŭnikaŭ, raspylali haz». Jon nikoha nie zatrymlivaŭ u toj dzień. U jakaści svajho adrasu jon nazvaŭ adras hrodzienskaha aktyvista Ježy Hryhienčy. Na pytańnie, čamu mienavita hetyja danyja, adkazaŭ: «Heta sakretnaja infarmacyja, my zasakrečanyja».
Dalej dapytvali amapaŭca «Ihara Miańko». Jakija niepasredna niezakonnyja dziejańni ździajśniali abvinavačanyja, jon patłumačyć nie zmoh.
U pracesie ŭžo dapytanyja ŭsie paciarpiełyja i śviedki. Na nastupnym pasiadžeńni płanujuć hladzieć videamateryjały spravy.
