Były śledčy pra zatrymańnie Cichanoŭskaha: Kalehi aburanyja tym, jak heta rabiłasia i chto byŭ zadziejničany
Vynikam pravakacyi na pikiecie ŭ Hrodnie stała zatrymańnie błohiera Siarhieja Cichanoŭskaha i šerahu jaho paplečnikaŭ. Ciapier jany pieraviedzieny ŭ Minsk, zaviedziena kryminalnaja sprava pa artykule 364 Kryminalnaha kodeksu (Hvałt abo pahroza hvałtu ŭ dačynieńni da supracoŭnika orhanaŭ unutranych spraŭ).
Čytajcie taksama:
Pravakacyja ŭ Hrodnie: AMAP zatrymaŭ Cichanoŭskaha VIDEA
MUS pra zatrymańnie Cichanoŭskaha: zaviedziena kryminalnaja sprava
Dla «Našaj Nivy» svaju dumku nakont zatrymańnia vykazaŭ niadaŭni śledčy Jaŭhien Juškievič.
Juškievič dva hady adpracavaŭ pazaštatnym supracoŭnikam u śledstvie minskaj prakuratury, potym jašče piać — śledčym, pakul nie syšoŭ z pasady staršaha śledčaha adździeła pa rasśledavańni ekanamičnych złačynstvaŭ upraŭleńnia Śledčaha kamiteta pa Minsku. Ciapier pracuje ŭ IT-śfiery.
Jon zaŭvažnaja i viadomaja fihura ŭ jurydyčnych kołach Biełarusi.
Juškievič padkreślivaje, što jaho mierkavańnie nielha ličyć dakładnaj ekśpiertyzaj zdareńnia, bo ŭ jaho niama ŭsich materyjałaŭ, jakija mohuć mieć značeńnie. U svaich vysnovach jon abapirajecca tolki na toje, što jość u publičnym dostupie.
«Nakolki ja baču ź videa, Cichanoŭski ŭvohule nijakich dziejańniaŭ ŭ dačynieńni da milicyi nie pradprymaŭ. Uvohule nijakich! A taksama ŭ dačynieńni da inšych asob, — kaža Juškievič. — Artykuł 364, pa jakim raspačataja sprava, praduhledžvaje tolki aktyŭnyja dziejańni, tamu ja mahu padumać, što samoha Cichanoŭskaha mahli zatrymać tolki ŭ ramkach administratyŭnaha pracesa, bo ŭ jaho byli nieadbytyja sutki».
«Skarha hramadzianki: «Jon mnie nie adkazvaje na pytańni» — nie źjaŭlajecca padstavaj dla zatrymańnia ni pa adnym artykule ŭ ramkach kryminalnaha ci administratyŭnaha prava.
Što datyčyć dziejańniaŭ inšych ludziej paśla zatrymańnia Cichanoŭskaha, to tut možna znajści skład pravaparušeńnia ci złačynstva.
Tamu tut niezrazumieła, ci raspačali spravu ŭ dačynieńni da Cichanoŭskaha, ci ŭ dačynieńni da nievyśvietlenych asob, jakija, naprykład, adłamali dźviery ŭ mašynie AMAPu.
Jak praviła, rabotniki siłavych viedamstvaŭ nie zajaŭlajuć na vypadki «škamutańnia», bo heta častka ich raboty, ale sarvany pahon ci šturšok u śpinu jurydyčna źjaŭlajecca nahodaj dla taho, kab raspačać spravu.
Kali niechta inšy ŭ natoŭpie šturchaŭ niejkich amapaŭcaŭ ci biŭ u žyvot milicyjaniera (choć hetaha i nie vidać na videa), to takoje adnaznačna ličyłasia b złačynstvam i ŭ luboj inšaj krainie.
Naprykład, u Štatach hvałt u adnosinach supracoŭnikaŭ užyvać nielha ŭvohule nikoli — dakazvaj potym svaju racyju ŭ sudzie.
Ale jość kankurujučaja norma: u čałavieka jość prava na nieabchodnuju abaronu.
Kali hramadzianin jaŭna bačyć, što supracoŭnik u formie ździajśniaje złačynstva ci niepravamocny ŭčynak, jon maje prava spynić jaho. I ludzi, jakija abaraniali Cichanoŭskaha ad zatrymańnia, mahli dabrasumlenna vykonvać svoj hramadzianski abaviazak pa nieabchodnaj abaronie.
Zrazumieła, što ŭ Biełarusi takoje nie pracuje.
Ja zhodny sa Šrajbmanam, što heta kryvaja akcyja pa likvidacyi palityčnych kankurentaŭ. Ja abmiarkoŭvaŭ situacyju z kalehami, jakija ciapier pracujuć: jany aburanyja i tym, jak heta ŭsio rabiłasia, i tym, chto mienavita pry hetym byŭ zadziejničany. Palityčny składnik vidavočny».
Čytajcie taksama:
«Pryjemnaja dziaŭčyna pyšnych form». Identyfikavali pravakatarku z sustrečy ź Cichanoŭskim
Były top-śledčy pra realii raboty SK: jak pracuje, što balić i jak źmianić da lepšaha
