Karanavirus vyjaŭleny ŭ 15 rasijskich rabotnikaŭ na Astravieckaj AES
Čutki pra ŭspyšku karanavirusa siarod pracaŭnikoŭ Astravieckaj AES chadzili daŭno.
Pavodle aficyjnaj statystyki, u Hrodzienskaj vobłaści z karanavirusam špitalizavali 11 čałaviek. Heta danyja na 8:00 8 krasavika.
Razam z tym Hrodzienski abłasny adździeł zdaroŭja 8 krasavika raspaŭsiudziŭ nastupnuju statystyku:
«Łabaratorna paćvierdžany 15 vypadkaŭ karanavirusa ŭ hramadzian Rasii, jakija prybyli na AES u h. Astraviec. Usie jany špitalizavanyja, izalavanyja. Kliničnych prajaŭ niama, pravodzicca epidemijałahičnaje rasśledavańnie, ciapier vyznačajucca kantakty pieršaha ŭzroŭniu».
Na svajoj pres-kanfierencyi 8 krasavika ministr achovy zdaroŭja taksama pryznaŭ najaŭnaść karanavirusa na AES.
«U hrupy rasijskich budaŭnikoŭ na BiełAES, jakija znachodzilisia na karancinie, paŭtornaje łabaratornaje testavańnie dało stanoŭčy vynik, — kazaŭ Uładzimir Karanik. — Ich špitalizavali, pravodzicca pahłyblenaje abśledavańnie».
Ministr adznačyŭ, što ŭsie zamiežniki prachodziać karancin i teściravańnie pierad tym, kab być dapuščanymi da pracaŭ na AES.
