Dzieci vučylisia ŭ Šviejcaryi, piša muzyku dla Lepsa. Chto taki novy premjer Rasii Michaił Mišuścin?
Imia novaha premjera Rasii dastatkova nieviadomaje ŭ Biełarusi (dy i ŭ samoj Rasii). Chto ž taki Mišuścin? Pra heta — u artykule «NN».
Z kampjutarščykaŭ — u padatkaviki
Michaiłu Mišuścinu 53 hady. Jon naradziŭsia ŭ Maskvie ŭ siamji vajskoŭca. Pa adukacyi — inžynier-sistematechnik. U pieršyja hady paśla razvału SSSR zajmaŭsia kampjutarnymi technałohijami, pracavaŭ u «Mižnarodnym kampjutarnym kłubie».
U 1998 jon vyrašaje radykalna źmianić žyćcio i pierachodzić na pracu Dziaržaŭnuju padatkovuju słužbu. Doŭhi čas i pry roznych ministrach Mišuścin byŭ namieśnikam ministra pa padatkach i zborach. U viedamstvie jon adkazvaŭ za infarmatyzacyju.
Papracavaŭ kiraŭnikom Raśnieruchomaści, Fiederalnaha ahienctva pa kiravańni asablivymi ekanamičnymi zonami. Mišuścina źviazvali ŭ hety čas ź imiem tahačasnaha ministra ekanamičnaha raźvićcia Hiermana Hrefa.
U 2008 hodzie Mišuścin sychodzić u pryvatny siektar. Jon uznačalvaje kampaniju UFG Capital Partners, jakaja naležyć byłomu ministru finansaŭ Rasii Barysu Fiodaravu, mienavita jaho pamočnikam kaliści i išoŭ pracavać va ŭrad Mišuścin. Paśla taho, jak Fiodaraŭ pamior u Łondanie ad insultu, Mišuścin znoŭ viartajecca na dziaržaŭnuju słužbu.
Mutnyja suviazi
Alesia Vaskrasienskaja.
U krasaviku 2010 hoda Mišuścin stanovicca kiraŭnikom Fiederalnaj padatkovaj słužby. U Rasii hetaje viedamstva maje reputacyju jak adnaho z najbolš karumpavanych.
Naprykład, letaś błohiery znajšli ŭ 28-hadovaj pamočnicy Mišuścina dvuchuzroŭnievuju kvateru na Patryjaršych prudach płoščaj 190 kvadratnych mietraŭ. I choć u Alesi Vaskrasienskaj byŭ nie samy mały zarobak, ale kab zarabić na takoje žyllo joj patrebna było b pracavać piaćdziasiat hadoŭ.
Na spravie ž Vaskrasienskaja — dačka sienatara Aleha Tkača, razam ź Mišuścinym Tkač adnaŭlaŭ chram na Rubloŭcy. Ich źviazvajuć ciopłyja siabroŭskija adnosiny.
Adnym z najbližejšych siabroŭ Mišuścina nazyvajuć biznesmiena Alaksandra Udodava, jaki maje niekalki vielmi mutnych kantor, što, chutčej za ŭsio, śpiecyjalizujucca na vyvadzie hrošaj u finansavyja afšory. Rasijskija błohiery adznačajuć, što Udodaŭ moža spać spakojna, kali jon maje takoha ŭpłyvovaha patrona, jak Mišuścin.
Majomaść na Rubloŭcy
Mišuścin (sprava) z žonkaj.
Što tyčycca samoha Mišuścina, to na jaho imia faktyčna niama zarehistravanaj nieruchomaści. Zatoje ŭ jahonaj siamji vielmi šyrokija ŭładańni. Ahułam ža na siamju Mišuścina ŭ Rubloŭcy aformlena 2,6 hiektara ziamli. Jany pierapisanaja na mamu, na siastru, na žonku.
Vydańnie «Prajekt» paviedamlaje, što Mišuścin schavaŭ toj fakt, što vałodaje vializnym domam na Rubloŭska-Uśpienskaj šašy, jaki aceńvajecca amal na 10 miljonaŭ dalaraŭ. Hety katedž jon pabudavaŭ jašče ŭ čas znachodžańnia na pasadzie namieśnika ministra pa padatkach i zborach.
Cikava, što ciapier u Rasrejestry ŭładalnikam hetaha katedža značycca «Rasijskaja Fiederacyja». Cikava, što sam Mišuścin moh i spryčynicca da taho, što majomaść hetaja była «schavanaja», bo jon ad 2004 da 2006 hoda ŭznačalvaŭ Fiederalnaje ahienctva kadastra abjektaŭ nieruchomaści.
Dzieci vučylisia ŭ Šviejcaryi
Plamieńnica Mišuścina ŭ insthramie ź miemam «Mnie po…j».
U Michaił Mišuścina troje synoŭ. Dvoje ź ich užo paŭnaletnija. Uładalnikam ichniaj majomaści na Rasrejestry taksama paznačanaja «Rasijskaja Fiederacyja».
Starejšyja syny Mišuścina, Alaksandr i Alaksiej, u svoj čas vučylisia ŭ Šviejcaryi. Paśla taho, jak Alaksandr viarnuŭsia ŭ Rasiju, jamu daviałosia mocna dahaniać u kursie «ruskaj movy». Vučylisia jany ŭ Šviejcaryi ŭ škole-internacie Institut Le Rosey.
Hadavoje navučańnie ŭ takoj škole kaštuje kala 120 tysiač dalaraŭ. U svoj čas hetuju ž navučalnuju ŭstanovu naviedvali šach Irana, karali Ispanii i Jehipta. Chutčej za ŭsio, u Šviejcaryi jany vučylisia ŭ pieryjad 2012—2013 hadoŭ. Ciapier jany atrymlivajuć vyšejšuju adukacyju ŭ Rasii. Plamieńnica Mišuścina Safija Ścienina-Mišuścina ličyć Šviejcaryju svajoj radzimaj, u hetaj krainie jana atrymała rezidenctva.
Chakiej i muzyka dla Lepsa
Ciapier Mišuścin uvachodzić u praŭleńnie Fiederacyi chakieja Rasii, źjaŭlajecca amataram CSKA. Amatarskaja kamanda Mišuścina nazyvajecca Sportima. Što tyčycca chobi Mišuścina, to, niahladziačy na svaju kamplekcyju, jon vialiki amatar hulni ŭ chakiej. Kažuć, što hetaje zachapleńnie pačałosia dla taho, kab być bližejšym da jašče adnaho ŭpłyvovaha ŭ Rasii čałavieka — Siarhieja Naryškina [u minułym kiraŭnik Administracyi prezidenta i śpikier Dziaržaŭnaj Dumy, ciapier kiraŭnik Słužby źniešniaj raźviedki].
Zrešty, heta nie adzinaje zachapleńnie Mišuścina. Akazvajecca, novy premjer Rasii — aŭtar muzyki niekatorych pieśniaŭ Hryhoryja Lepsa. Naprykład, pieśni «Popieł» i «Sapraŭdnaja žančyna» vykonvajucca mienavita na muzyku Mišuścina. Kažuć, što jon asabista dobra viedaje šmat kaho ŭ šou-bizie. Nie praminaje mahčymaści naviedać kancerty. Sam niabłaha składaje roznyja prypieŭki i satyryčnyja vieršyki.
