Prychadžanka carkvy «baciuški sa svastykaj»: Jon abaraniaŭ nas ad hetaha… jeŭrapiejskaha, zachodniaha
Supracoŭnica chrama raskazała Svabodzie, što nie vieryć u novyja abvinavačvańni suprać Kanstancina Burykina, viadomaha jak «baciuška sa svastykaj».
Pravasłaŭnuju carkvu ŭ pasiołku Hatava la Miensku Burykin pabudavaŭ dla taho, kab mieć mahčymaść stać śviatarom bieź nieabchodnaj adukacyi. Paśla aryštu Burykina nabaženstvy ŭ chramie pravodziać pa čarzie dva inšyja śviatary — protaijerej Iaan Zadarožyn i śviatar Alaksandar Hračyšnikaŭ.
Pa słovach ludziej, jakija pracujuć pry chramie, ciapier nabaženstvaŭ tut mała. Jany adbyvajucca pieravažna pa vychodnych. U pracoŭnyja dni ŭ carkvu amal nichto nie prychodzić.
Pry carkvie źbirajuć srodki dla siamji Burykina.
«Ja čuła pra novyja abvinavačvańni suprać ajca Kanstancina, čytała hety artykuł, — raskazała adna z žančyn, jakija pracujuć pra chramie ŭ Hatavie. — Ja nia vieru va ŭsio heta, nie mahu pavieryć. Vierahodna, jaho dačka raskazała pra ŭsio heta pad niejkim uździejańniem, u mianie niama inšaha tłumačeńnia».
Žančyna havoryć, što viedaje Kanstancina Burykina z 2011 hodu, kali pryjšła pracavać u carkvu. Pa jaje słovach, dla ŭsich prychadžan chrama ŭ Hatava stała šokam jaho zatrymańnie pa abvinavačvańniu ŭ niezakonnym zachoŭvańni zbroi. Što miarkujuć prychadžanie pra novyja abvinavačvańni, skazać ciažka. Nabaženstvaŭ u carkvie paśla hetaha jašče nie było.
«My nie vierym u toje, što ajciec Kanstancin moh heta ŭsio rabić, — praciahvaje žančyna. — Z nami z usimi jon zaŭsiody byŭ dobry, nijakich zaŭvah. Jon zaŭsiody abaraniaŭ nas ad usiaho hetaha… Ad eŭrapiejskaha, zachodniaha. A tut takija abvinavačvańni».
Śviatar Alaksandar Hračyšnikaŭ, jaki ciapier słužyć u chramie ŭ Hatava i źjaŭlajecca namieśnikam staršyni Synadalnaha adździeła pa spravach moładzi Biełaruskaj pravasłaŭnaj carkvy, nia staŭ kamentavać novyja abvinavačvańni na adras Kanstancina Burykina. Protajarej Iaan Zadarožyn pakul niedasiažny dla kamentaroŭ.
