Pussy Riot: Nam patelefanavała Natalla Kačanava i paprasiła prabačeńnia za zabaronu na ŭjezd
U pryjomnaj Administracyi prezidenta paćvierdzili fakt takoj razmovy, ale admovilisia kamientavać jaje źmiest, piša Radyjo Svaboda.
Kiraŭnik Departamienta hramadzianstva i mihracyi Alaksiej Biahun paćvierdziŭ Radyjo Svaboda, što Nikulšyna i Kuračava nie majuć zabarony na ŭjezd u Biełaruś i mohuć pryjechać na Jeŭrahulni.
Volha Kuračava i Vieranika Nikulšyna majuć zapis razmovy z žančynaj, jakaja nazvałasia kiraŭnicaj Administracyi prezidenta Biełarusi Natallaj Kačanavaj, vykazała škadavańnie ab tym, što adbyłosia, i zaprasiła pryjazdžać u Biełaruś.
17 červienia ŭdzielnicam hurtu Pussy Riot, jakija lacieli tranzitnym rejsam u Kijeŭ ź pierasadkaj u Minsku, pastavili štamp ab zabaronie na ŭjezd u Biełaruś da 2020 hoda. Zabaronu paćvierdziŭ pres-sakratar Pamiežnaha kamiteta Biełarusi.
Udzielnik hurtu Piotr Viarziłaŭ raskazaŭ Svabodzie, što spačatku ź dziaŭčatami źviazaŭsia niechta, chto nazvaŭsia pradstaŭnikom MUS. Udakładniŭ ichny telefon, a paźniej adbyŭsia taki zvanok u «Telehram». Voś jaho rasšyfroŭka:
— Volha Uładzimiraŭna, heta vas turbuje kiraŭnik administracyi Biełarusi Natalla Ivanaŭna Kačanava.
— Vielmi pryjemna… A možna vas paprasić krychu hramčej kazać, usio-taki suviaź nie vielmi dobraja.
— Volha Uładzimiraŭna, nu manitorym my tut usiu situacyju. I Alaksandr Ryhoravič, prezident naš, daviedaŭsia pra hetuju situacyju, što tut niejkija pretenzii da vas. Dyk voś, vy viedajecie, u nas da vas niama nijakich pretenzij. Volha Uładzimiraŭna, kali łaska, u biełaruskaha boku niama da vas nijakich pretenzij. Kali chočacie, pryjazdžajcie, budziem radyja.
…Nu viedajecie, jak zaŭsiody, dzieści pierastar… pierapracavali našy orhany, niezrazumieła pa jakich pytańniach, tamu tut užo tak atrymałasia…
— My razumiejem, dziakuj vam vialiki.
— Kažu, što było ździŭleńnie, prosta ździŭleńnie — navošta, čamu, što? My ŭbačyli sa srodkaŭ masavaj infarmacyi, ubačyŭ naš prezident, kaža: «Boža, što heta takoje? A jakija ŭ nas da ich pytańni? Niama nijakich pytańniaŭ». Usio, niama pytańniaŭ, značyć, ja vam telefanuju. Tak što, Volha Uładzimiraŭna, usiaho dobraha vam.
«Kali ŭ našych bazach dadzienych niama źviestak pra toje, što im zabaronieny ŭjezd na terytoryju Respubliki Biełaruś, jany buduć prapuščanyja», — paviedamiŭ Svabodzie pradstaŭnik pres-słužby Pamiežnaha kamiteta Anton Byčkoŭski. Paviedamlać, ci admienienaja ŭ dačynieńni dziaŭčat zabarona na ŭjezd, jon admoviŭsia, spasłaŭšysia na toje, što heta asabistyja źviestki.
«My, viadoma, vielmi mocna byli ździŭlenyja, — kaža Piotar Viarziłaŭ. — Ździŭlenyja, pa-pieršaje, raptoŭnaj zabaronie, bo dziaŭčaty nie lacieli ŭ Minsk i nie mieli płanaŭ vychodzić u Minsku. Usim kampietentnym orhanam było vidavočna, što jany laciać tranzitam z Maskvy ŭ Kijeŭ, nie majuć nijakich płanaŭ znachodzicca ŭ Biełarusi.
I ŭdvaja bolš dziŭnym byŭ fakt takoha telefanavańnia, bo Biełaruś viadomaja svaim davoli strohim staŭleńniem da dysidentaŭ. Ale radasna, što prynamsi tak chutka kiroŭnyja asoby krainy adreahavali na takuju dziŭnuju zabaronu i źniali jaje asabistym telefanavańniem kiraŭnicy Administracyi prezidenta Biełarusi. I ja, i dziaŭčaty mocna ździvilisia hetamu faktu».
