U Maskvie zatrymali karespandenta «Mieduzy», jaki rasśledavaŭ karupcyju. Abvinavačvajuć u prodažy narkotykaŭ
Fota z Ukantakcie.
U Maskvie ŭ čaćvier zatrymali śpiecyjalnaha karespandenta «Mieduzy» Ivana Hałunova. Jak raspavioŭ Ruskaj słužbie Bi-bi-si advakat Dźmitryj Džułaj, Hałunoŭ byŭ zatrymany ŭ 14:30 6 červienia, kali nakiroŭvaŭsia na sustreču z krynicaj.
Pa słovach advakata, žurnalista zatrymali niekalki apieratyŭnikaŭ, pry vobšuku jany nibyta znajšli ŭ jaho ŭ zaplečniku skrutak z narkatyčnym rečyvam. Paźniej jašče adzin skrutak byŭ znojdzieny pry vobšuku ŭ kvatery Hałunova.
Karespandenta dastavili ŭ adździeł palicyi, dzie jamu paviedamili, što jon padazrajecca ŭ ździajśnieńni złačynstva, praduhledžanaha artykułam 228.1 Kryminalnaha kodeksu (niezakonnyja vytvorčaść, zbyt abo pierasyłka narkatyčnych srodkaŭ, psichatropnych rečyvaŭ abo ich anałahaŭ).
Jak raspavioŭ Bi-bi-si śledčy Ihar Łapacin, Hałunoŭ zatrymany pry zamachu na zbyt miefiedronu. RBK ŭ pres-słužbie staličnaha ŭpraŭleńnia MUS paviedamili, što Hałunoŭ «byŭ zatrymany na Ćviatnym bulvary ŭ chodzie apieratyŭna-vyšukovych mierapryjemstvaŭ».
U viedamstvie śćviardžajuć, što pry asabistym nadhladzie ŭ Hałunova byli vyjaŭlenyja piać skrutkaŭ z paraškapadobnym rečyvam, a pry pieratrusie doma — jašče try pakiety, skrutak z paraškapadobnym rečyvam i šali.
Zatrymany žurnalist viny nie pryznaje i ličyć heta pravakacyjaj. Jon zajaviŭ, što apieratyŭniki spracavali «vielmi kiepska».
Meduza vypuściła zajavu, u jakoj piša, što nie sumniavajecca ŭ nievinavataści Hałunova. Jon paśpieŭ paviedamić vydańniu praź siabroŭ, što jamu padkinuli dva pakiety ź nieviadomym rečyvam. Pa słovach Hałunova, jamu nie dali patelefanavać ź jaho telefona i vyklikać advakata.
Pieraśled žurnalista vydańnie źviazvaje ź jaho pracaj. «My viedajem, što ŭ apošnija miesiacy Vaniu pastupali pahrozy; viedajem, u suviazi ź niejkim tekstam, zdahadvajemsia, ad kaho».
