«Cyhanskaha śledu zusim mahło nie być». Były śledčy Vołčak — pra rasśledavańnie zabojstva inśpiektara DAI
Były śledčy prakuratury Aleh Vołčak pa prośbie «Biełsata» acaniŭ prafiesijanalizm milicyi i śledčych, jakija zajmajucca rasśledavańniem zabojstva ŭ Mahilovie inśpiektara DAI Jaŭhiena Patapoviča.
Aleh Vołčak — staršy śledčy prakuratury Frunzienskaha rajonu Minska ŭ 1994—98 hadach. Były deputat Minskaha haradskoha savietu. Zajmajecca pravaabarončaj dziejnaściu.
— Jakija šancy raskryć hetuju spravu, kali na treci dzień paśla zabojstva padazravanych uściaž niama?
— Heta narmalny praces śledstva: jon idzie dva miesiacy, a potym vyrašajecca pytańnie ab praciahnieńni papiaredniaha śledstva. Heta standartnaja praktyka: pracujuć, šukajuć.
Kali pravilna ahledžanaje miesca zdareńnia, kali sabrać dokazy i pravieści apieratyŭnyja mierapryjemstvy, to [złačyncaŭ] možna znajści i praź piać, i praź dziesiać hadoŭ. U majoj praktycy było zabojstva, jakoje raskryli praz 15 hadoŭ. Hałoŭnaje, kab usio było sabrana prafiesijna: dokazy, telefonnyja zvanki, jakija byli ŭ hetym rajonie, ślady kołaŭ, pałamanaje hallo.
— Nakolki prafiesijnym vyhladaje rasśledavańnie, kali mierkavać pa tym, što raspaviadaje pra heta sam Śledčy kamitet?
— Kiepska, što niama nijakaj kanfierencyi Śledčaha kamitetu, na jakoj chacia b raspaviali, što jany zrabili papiarednie, jakija vyšukovyja mierapryjemstvy praviali.
Mnie nie padabajecca toje, što ŭsich cyhanoŭ pa Biełarusi pačali tuzać i zatrymlivać biez nahody i pryčynaŭ. Cyhany pačali chavacca pa kvaterach, bo bajacca źbićcia i zatrymańnia. Heta nieprafiesijnaja praca. Tak nie łoviać złačyncaŭ.
«Milicyjanty pavodzili siabie z nami narmalna, nie zatrymlivali, a zaprasili vietliva prajechać ź imi, ja pahadziŭsia. Usio było narmalna, takaja ŭ ich praca, prablem nie baču. Nichto nikoha nie biŭ», — raskazvali ŭ Mahilovie karespandentu NN na druhi dzień paśla zabojstva. Fota Nadziei Bužan.
— Vy pieršy zajavili, što viersija z «cyhanami na čornaj «Vołzie»» moža być iłžyvym śledam. Čamu abłavy na cyhanoŭ praciahvajucca, niahledziačy na toje, što niepryjarytetnaj hetuju viersiju pryznaŭ taksama Śledčy kamitet?
— Heta prablema adsutnaści narmalnaha kiraŭnictva Śledčaha kamitetu na miescach. Raniej takimi spravami kiravali prakurory.
Padčas majoj pracy ŭsio rabiłasia našmat bolš piśmienna — pa ciažkich złačynstvach u nas byli štodzionnyja narady, na jakich abmiarkoŭvalisia ŭsie mahčymyja viersii. Naturalna, u nas nikoli nie było adnoj — zvyčajna my raspracoŭvali ad piaci da siami viersijaŭ.
Nakolki ja baču, u hetaj spravie cyhanskaha śledu zusim mahło nie być.
Chutčej za ŭsio, treba šukać miascovyja varyjanty. Moža być u hetaha maładoha milicyjanta była suviaź ź niejkimi niezrazumiełymi ludźmi.
— Jak vy prakamientujecie toje, što ministr unutranych spravaŭ nie pryjechaŭ na pachavańnie Jaŭhiena Patapoviča?
— Liču, u hetaj situacyi pavinnaja była być abjaŭlenaja milicejskaja žałoba. Kali zabivajuć palicyjanta ŭ Štatach, tam pravodziać žałobnyja mierapryjemstvy.
Hetak u nas i prajaŭlajecca adsutnaść prestyžu pracy dla šarahovych supracoŭnikaŭ u orhanach.
Apytanka
