Pažar u Notr-Dam pahasili, sabor uratavany
Pažar u sabory Notr-Dam-de-Pary ŭ Francyi łakalizavany, a zatym patušany — supracoŭnikam ekstranych słužbaŭ udałosia ŭziać ahoń pad kantrol, paviedamiŭ CNN pradstaŭnik paryžskaj palicyi. Parisien u svaju čarhu udakładniaje, što ŭ budynku jašče jość niekalki ahmianioŭ uzharańnia.
Le Monde
Pry hetym pradstaŭnik pažarnych słužbaŭ, padpałkoŭnik Habryel Plus zajaviŭ Le Figaro i Reuters, što ŭ cełym «pažar pahašany». «[Ale] my praciahniem sačyć za reštkavymi ŭzharańniami i astudžać kanstrukcyi, kantralujučy, kab połymia nie adnaviłasia», — dadaŭ jon.
Astatnich detalaŭ ab tym, što adbyvajecca na miescy zdareńnia, surazmoŭcy vydańniaŭ i telekanała nie pryvodziać.
Jak miarkujecca, pryčynaj pažaru mahli stać raboty pa restaŭracyi budynka, u ramkach jakich vakoł sabora byli ŭźviedzieny lasy vyšynioj 100 mietraŭ. Hałoŭny architektar restaŭracyi Filip Vilnioŭ zajaviŭ, što rabočych padčas pačatku pažaru na placoŭcy nie było.
Pažar u sabory Notr-Dam pačaŭsia 15 krasavika kala 18:30 pa minskim časie. Ahoń źniščyŭ dźvie traciny dachu, špil i hadzińnik sabora. Pavodle acenak ekśpiertaŭ, restaŭracyja budynka moža zaniać ad piaci da niekalkich dziasiatkaŭ hadoŭ. Raniej prezident Francyi Emaniuel Makron paabiacaŭ francuzam, što sabor Paryžskaj Božaj Maci budzie adnoŭleny.
