«Buduć prablemy»: u Salihorsku nastaŭnica zmusiła školnika vydalić z sacsietak napisany im patryjatyčny vierš
«Našaj Nivie» stała viadoma pra dziŭnuju situacyju, jakaja zdaryłasia ŭ salihorskaj himnazii №1.
U hetaj himnazii, u 10 «A» kłasie, vučycca chłopiec Hierman Lebiedź.
Jon alimpijadnik pa historyi, vučycca dobra — siaredni bał vyšejšy za 8, pakrysie paŭzie da dzieviaci.
Adno z zachapleńniaŭ školnika — paezija, jon i sam piša vieršy.
Hierman.
Na dniach jon vykłaŭ na svaju staronku UKantakcie voś taki:
Bieł-čyrvona-bieły ściah
Dzie bieły — niezaležnaść
Staju pad ściaham pieramoh
I čuju prynaležnaść
Da pośpiechaŭ, da baraćby
Za čystuju svabodu
Niama ciapier jaje ŭ nas
Viartajcie ściah narodu
My sami možam vybirać
Pakińcie nas u spakoi
Moj — bieł-čyrvona-bieły ściah
Moj hierb — heta Pahonia.
Imavierna, vierš byŭ prymierkavany da 25 Sakavika.
Što było dalej, «Našaj Nivie» raskazali siabry siamji i mama školnika:
«Synu pačali pahražać «prablemami ŭ budučyni» i zmusili vydalić heta z sacsietak, kali jon hetych «prablem» nie choča. Jon vydaliŭ. Zdajecca, chłopiec nie vielmi pierajmajecca, ale spaŭ siońnia kiepska», — skazała nam mama Hiermana.
Pavodle žančyny, ź im praviali razmovu ŭ škole, a na nastupny dzień u siamju čakajecca vizit sa škoły, bo ŭ inšych vieršach chłopca ŭhledzieli «suicydalnyja idei».
Sam Hierman pra situacyju havaryć nie choča i ličyć, što jaho kłasnaja — nie asnoŭny ruchavik situacyi, a što jana atrymlivaje zahady «vyšej».
U samoj škole situacyju pakul nie kamientujuć: «Ckavańnia školnika niama, situacyja vyhladaje nie tak», — skazała «Našaj Nivie» namieśnica dyrektara pa vychavaŭčaj rabocie Valancina Lańko.
Z kłasnaj kiraŭnicaj chłopca, Natallaj Arłukievič, źviazacca mahčymaści niama, bo siońnia ŭ Salihorsku alimpijady.
U profili hetaj žančyny na sajcie škoły paviedamlajecca, što jaje piedahahičny staž 17 hadoŭ, jana vykładaje ruskuju movu.
Jaje kreda hučyć tak:
«Hołub — eto ja.
Ja — v tvorčieskom poletie.
Tvorčieskij polet nie ohraničien himnazijej.
On — moja žizń!»
Ministerstva adukacyi maje prakamientavać situacyju najbližejšym časam.
