Dyrektarka «Biełsata»: Mianie niepakoić reabilitacyja «Buraha»
«Mianie niepakojać kroki pa reabilitacyi «Buraha», — napisała ŭ svaim fejsbuku Ahnieška Ramašeŭskaja-Huzy. — Hetaje dziejańnie supiarečyć polskaj tradycyi, u jakoj nie apraŭdvajecca źniščeńnie biezabaronnych kabiet i dziaciej i nie ŭšanoŭvajucca tyja, chto heta robić», — napisała jana.
Ahnieška Ramašeŭskaja-Huzy — dačka lehiendarnaha aktyvista polskaj «Salidarnaści», u kvatery jakoha ŭ kamunistyčnyja časy adbyvalisia zaniatki padpolnaha ŭniviersiteta.
Napiaredadni Polski Instytut nacyjanalnaj pamiaci apraŭdaŭ kiraŭnika polskaha antykamunistyčnaha padpolla Ramualda Rajsa «Buraha», jaki, siarod inšaha, u 1946 spaliŭ piać biełaruskich viosak na Padlaššy.
Ramuald Rajs («Bury»), fota vajennaha času.
Polski Instytut nacyjanalnaj pamiaci apraŭdaŭ Ramualda Rajsa «Buraha», śćviardžajučy, što raniejšyja vysnovy Instytuta ab jaho ŭdziele ŭ hienacydzie etnična biełaruskaha nasielnictva na Padlaššy byli «chibnymi», piša Radyjo Svaboda.
U 2005 hodzie śledčyja Instytuta nacyjanalnaj pamiaci, jaki zajmajecca kamunistyčnymi i nacysckimi złačynstvami suprać polskaj nacyi, zrabili vysnovu, što dziejańni kamandzira polskaha antykamunistyčnaha padpolla Ramualda Rajsa (mianuška «Bury») u studzieni-lutym 1946 hoda «mieli prykmiety hienacydu» ŭ adnosinach da pravasłaŭnych biełarusaŭ.
Vystava pamiaci achviar teroru ŭ Zalešanach. Fota radyjo «Racyja».
Ciapier Instytut nacyjanalnaj pamiaci, u jakim, paśla prychodu da ŭłady partyi Prava i spraviadlivaść Jarasłava Kačyńskaha, źmianiłasia kiraŭnictva, skasavaŭ vysnovy śledčych z 2005 hoda, nazyvajučy ich «chibnymi». Adnačasova Instytut zajaviŭ, što adzinym pravamocnym rašeńniem u spravie «Buraha» źjaŭlajecca sudovaja pastanova z 1995 hoda, jakaja skasavała śmiarotny prysud «Buramu» z 1949 hoda i reabilitavała jaho, vyrašyŭšy, što jon u 1946 hodzie znachodziŭsia ŭ «abstavinach vyšejšaj nieabchodnaści, jakaja prymušała jaho rabić dziejańni nie zaŭsiody adnaznačnyja etyčna». A heta, u śviatle zakona, aznačaje, što za «Burym» niama nijakaj viny.
Demanstracyja polskich nacyjanalistaŭ u Hajnaŭcy.
U vyniku kryvavaha rejdu adździeła «Buraha» ŭ studzieni-lutym 1946 hoda zhareli, častkova abo całkam, vioski Zalešany, Volka, Špaki, Zani, Kancavizna. Zahinuli 79 čałaviek, u tym liku žančyny i dzieci dy 30 biełaruskich furmanaŭ, jakich «Bury» pierachapiŭ na šlachu svajho kryvavaha rejdu.
Čytajcie taksama: Unuk Rajsa «Buraha»: «Dzied zabivaŭ vorahaŭ Ajčyny, a siarod ich było šmat biełarusaŭ»
