Śpiecsłužby Litvy: Rasija razhladaje Biełaruś jak bufiernuju dziaržavu
Rasija paśladoŭna ŭmacoŭvaje vajennyja mahutnaści ŭ Kalininhradskaj vobłaści, ale raźmieščanyja ŭ Bałtyjskim rehijonie dadatkovyja siły NATA i nacyjanalnyja ŭzbrojenyja siły krain Bałtyi źnižajuć imaviernaść kanfliktu, havorycca ŭ štohadovaj acency pahroz, padrychtavanaj dźviuma litoŭskimi śpiecsłužbami — Departamientam dziaržbiaśpieki i vajennaj raźviedkaj Litvy, paviedamlaje interfax.by.
«Dysłakavanaja ŭ vobłaści vajennaja hrupoŭka paśladoŭna ŭmacoŭvajecca: abnaŭlajecca staraja i stvarajecca novaja vajennaja infrastruktura, farmujucca novyja vajennyja častki, pastaŭlajucca novyja ŭzbrajeńni i bajavaja technika, na suchaputnych i marskich palihonach vobłaści pravodzicca intensiŭnaja vajennaja padrychtoŭka», — adznačajecca ŭ dakumiencie, apublikavanym u aŭtorak.
Zhodna z padrychtavanaj acenkaj pahroz, Biełarusi ŭ rasijskaj vajennaj daktrynie advodzicca rola «bufiernaj» dziaržavy — RF vykarystoŭvaje terytoryju krainy dla płanavańnia vajennych apieracyj i demanstracyi vajennaj mocy, a rastučaja vajennaja intehracyja i ekanamičnaja zaležnaść źnižaje mahčymaści Minska ažyćciaŭlać niezaležnuju abaronnuju palityku i palityku biaśpieki.
Pa dadzienych litoŭskich śpiecsłužbaŭ, pašyrajučy vajennuju prysutnaść u Kalininhradskaj vobłaści Rasija pavyšaje zdolnaść vieści vajennyja dziejańni na praciahu 24-48 hadzin z momantu atrymańnia zahadu.
Ź inšaha boku, padkreślivajuć aŭtary dakumienta, pavieličeńnie nacyjanalnych uzbrojenych sił Bałtyjskich krain i dysłakavanych u rehijonie mahutnaściaŭ NATA ŭ vypadku vajennaha kanfliktu dazvolić paźbiehnuć šyrokaha ŭciahvańnia NATA i źnižaje vierahodnaść pačatku kanfliktu ŭ rehijonie.
