U Biełarusi dazvolili tranślavać ukrainski telekanał UA.TV. Ale nie zachaplajciesia
Zamiežnyja teleprahramy UA.TV (Ukraina), KazakhTV i «Chabar 24» (Kazachstan) atrymali dazvoł na raspaŭsiudžvańnie ŭ Biełarusi.
Siońnia ministr infarmacyi Alaksandr Karlukievič padpisaŭ zahad ab vydačy dazvołaŭ na raspaŭsiudžvańnie teleprahram hetych kanałaŭ.
UA.TV — heta aficyjozny kanał z davoli biednym kantentam, jaki mała kamu ŭ Biełarusi budzie cikavy. Samyja cikavyja ŭkrainskija kanały zastajucca ŭ Biełarusi niedastupnyja masavamu hledaču, jak i kanały polskija, jeŭrapiejskija i amierykanskija — i ŭ adroźnieńnie ad dziasiatkaŭ kanałaŭ rasijskich.
Sam momant dla ŭklučeńnia kanała vybrany tonka — jak i toje, što jaho pamiaścili ŭ adzin pakiet z dvuma kazachskimi kanałami. Zhodna z sacapytańniami, u Biełarusi davoli šmat ludziej razumiejuć ukrainskuju movu, ale amal niama nośbitaŭ kazachskaj.
