Dva hady tamu zabili Paŭła Šaramieta
20 lipienia 2016 hoda ŭ Kijevie zahinuŭ viadomy biełaruski, rasijski i ŭkrainski žurnalist Pavieł Šaramiet. Prafiesijnaja supolnaść straciła vybitnoha, advažnaha kalehu. Siabry i rodnyja — blizkaha čałavieka. Śledstva pa spravie za hety čas praktyčna nie prasunułasia — nie nazvanyja padazravanyja, niama ni abvinavačanych.
Aŭtamabil, u jakim Pavieł jechaŭ na pracu, vybuchnuŭ na skryžavańni centralnych vulic Kijeva. Vyratavać Paŭła było niemahčyma — atrymanyja traŭmy byli nie sumiaščalnyja z žyćciom. Palicyja paviedamiła, što pad aŭtamabil była zakładzienaja vybuchoŭka mahutnaściu da 600 hramaŭ u tratyłavym ekvivalencie, jakaja kiravałasia dystancyjna.
Prezident Ukrainy Piatro Parašenka patrabavaŭ ad siłavikoŭ spravazdačy ab chodzie rasśledavańnia.
Śledčyja vyśvietlili, što bombu zakłali pad mašynu mužčyna i žančyna. Jany trapili na videa z kamier nazirańnia. Za dapamohu ŭ pošuku palicyja Kijeva, a taksama były mer stalicy abjavili ŭznaharodžańnie. Ale śledstva i dahetul praktyčna nie prasunułasia — nie nazvanyja padazravanyja, niama ni abvinavačanych.
Namieśnik načalnika ŭpraŭleńnia Hałoŭnaha śledčaha ŭpraŭleńnia Nacyjanalnaj palicyi Ukrainy Alaksandr Koŭtun zajaŭlaŭ, što padčas rasśledavańnia zabojstva žurnalista Paŭła Šaramieta dapytanyja bolš za try tysiačy śviedkaŭ, adnak padazravanyja dahetul nie ŭstanoŭleny.
U hadavinu zabojstva Paŭła Šaramieta svajaki i kalehi naviedajuć mahiłu žurnalista na Paŭnočnych mohiłkach pad Minskam a 12-j hadzinie.
