U Čavusach adkryli pieršuju ŭ Biełarusi pamiatnuju došku kazakam FOTA
Na Mahiloŭščynie ŭ rajcentry Čavusy źjaviłasia pieršaja ŭ Biełarusi pamiatnaja doška kazactvu. Pravasłaŭnyja aktyvisty i kiraŭnictva rajonu ŭviekaviečyli takim čynam farmavańnie kazackaha połka ŭ 1654 hodzie, dziejnaść jakoha razam z tym nazvanaja «źjavaju nieadnaznačnaj», paviedamlaje Radyjo Svaboda.
«6 avhusta 1654 hoda v horodie Čausy był orhanizovan Biełorusskij (Čausovskj) kazackij połk, v kotorom «…s 1000 piešich s bierdyši, i s rohatiny, i s piŝalami, da konnych kriesťjan so 100 čiełoviek…»», — napisano na niej.
Paviesili došku na budynku rajonnaha krajaznaŭčaha muzeju pobač ź inšaj šyldaj, pryśviečanaj nadańniu horadu Mahdeburskaha prava. Jaje ŭstalavali ŭ 2016 hodzie ź inicyjatyvy Mahiloŭskaj abłasnoj arhanizacyi Tavarystva biełaruskaj movy.
Šylda mahdeburskamu minułamu Čavus.
Uračystaść adkryćcia šyldy kazactvu zładzili padčas chrosnaha chodu da 100-hodździa zabojstva siamji apošniaha rasiejskaha samadzieržcy Mikałaja Ramanava. Aficyjnyja krynicy paviedamlajuć, što srodki na vyrab pamiatnaha znaku źbiralisia hramadzkaściu.
U Čavuskim rajvykankamie tłumačać ustalavańnie doški «uviekaviečvańniem histaryčnaha faktu». Pavodle namieśnicy staršyni rajonnaj administracyi Taciany Radzivilinaj na ŭračystaści jaje adkryćcia vystupoŭcy nie davali acenak dziejnaści kazactva. Słužboŭka adznačyła, što dla hetaha jość historyki i navukoŭcy, jakija musiać traktavać «hetuju padzieju z roznych bakoŭ».
Budynak rajvykankamu.
«Dla nas duža važna, kab žychary našaha horadu, našy dzieci dy hości viedali, što na terytoryi Čavuskaha rajonu była takaja histaryčnaja padzieja. Drennaja jana, ci stanoŭčaja — u kožnaha svoj pohlad. Adkryvajučy došku my kanstatavali, što ŭ Čavuskim rajonie žyli śmiełyja, rašučyja ludzi, jakija lubili svaju ajčynu», — skazała Taciana Radzivilina.
Hazeta Čavuskaha rajvykankamu «Iskra», spasyłajučysia na słovy Taciany Radzivilinaj, adznačyła: «dziejnaść biełaruskaha kazactva ŭ peryjad XVII — źjava nieadnaznačnaja».