Kandydat u pasły Rasii ŭ Biełarusi prasłaviŭsia jak «smatraščy FSB». Ci stanie Biełaruś jaho tramplinam da najvyšejšych pasad u Maskvie?
12 hadoŭ pasłom u Biełarusi byŭ Alaksandr Surykaŭ — čynoŭnik i haspadarnik, stary, 77-hadovy. Na źmienu jamu Maskva choča vysadzić u Minsku desantnika i śpiecsłužbista ŭ adnym fłakonie — zusim maładoha. Heta Michaił Babič.
Babiču 49 hadoŭ. Naradziŭsia jon u Razani akurat u Dzień pamiežnika — 28.05.1969 hoda. Paśla škoły pastupiŭ u Razanskaje vyšejšaje kamandnaje vučylišča suviazi, jakoje rychtavała aficeraŭ pa śpiecyjalnaści «suviaź u pavietrana-desantnych vojskach».
Pa skančeńni vučylišča, zhodna z aficyjnaj bijahrafijaj, «prachodziŭ słužbu na kamandnych pasadach u Pavietrana-desantnych vojskach i vojskach KDB SSSR, braŭ udzieł u bajavych dziejańniach». Udzielničaŭ u Prydniastroŭskim kanflikcie dy ŭ Pieršaj čačenskaj vajnie, atrymaŭ miedal «Za advahu». Chiba ŭžo tady atrymaŭ i svaju dadatkovuju «śpiecyjalnaść» — «smotriaŝij» ad KDB/FSB za niepradkazalnymi subjektami».
U 1995 hodzie jahony padnahladny hienierał Alaksandr Kałmakoŭ byŭ pieraviedzieny na druhasnuju pasadu ŭ suchaputnyja vojski RF, a 26-hadovy (!) Michaił Babič uznačaliŭ tolki što stvoranuju pastanovaj Uradu Rasiejskaj Fiederacyi ad 01.12.1994 h. № 1309 AAT «Pramysłovaja kampanija «Kancern «Antej», 100% akcyjaŭ jakoj było zamacavanaje ŭ fiederalnaj ułasnaści.
Kancern «Antej» śpiecyjalizavaŭsia na vytvorčaści rakietnych sistem «S-300» i «Tor», ciapier heta «Kancern pavietrana-kaśmičnaj abarony «Ałmaz-Antej»». I voś hetaj supiervažnaj dla biaśpieki Rasii strukturaj byŭ pryznačany kiravać 26-hadovy Babič.
U 1998 hodzie 29-hadovaha «kidajuć» na inšy adkazny kirunak — zabieśpiačeńnie praduktovaj biaśpieki RF. Z 1998 hoda pa 1999 hod jon — pieršy vice-prezident kampanii «Rośmiasomołtorh». Z 1999 hoda pa studzień 2000 hoda byŭ pieršym namieśnikam hienieralnaha dyrektara HUP «Fiederalnaje ahienctva pa rehulavańni praduktovaha rynku» pry Ministerstvie sielskaj haspadarki i charčavańnia Rasii.
U hety momant na čale Rasiei staŭ Pucin, i 31-hadovy pałkoŭnik Babič byŭ adklikany z «kamandziroŭki ŭ sielskuju haspadarku» dla pracy pa asnoŭnaj svajoj śpiecyjalnaści. U pačatku 2000 h. Maskva pryznačaje jaho pieršym namieśnikam staršyni ŭrada Maskoŭskaj vobłaści — nahladčykam za tolki što abranym hubiernataram hetaj vobłaści, patencyjnym palitykam ahulnarasijskaha maštabu, Hierojem Savieckaha Sajuza hienierałam Barysom Hromavym, jaki pabudavaŭ svaju pieramožnuju vybarčuju kampaniju na krytycy Kramla. Ale kali Pucin pierakanaŭsia, što Hromaŭ całkam zadavoleny «karmleńniem» (jon prabyŭ hubiernataram až da 2012 h.) i na palityčnyja roli nie pretenduje, to pierakinuŭ Babiča ŭ inšy patencyjna «haračy punkt».
U 2001 hodzie pałkoŭnika pryznačajuć nahladać za inšym patencyjnym «buntaŭnikom» — hałavoj administracyi Ivanaŭskaj vobłaści kamunistam Uładzimieram Cichanavym, lidaram unutrypartyjnaj apazicyi suprać kišennaha kiraŭnika Kampartyi Ziuhanava.
Cichanaŭ byŭ abrany kiraŭnikom Ivanaŭskaj vobłaści ŭ śniežni 2000 h. u supraćborstvie z kandydaturaj Kramla i biez padtrymki Ziuhanava. U studzieni 2001 h. Maskva pryznačaje Babiča jahonym pieršym namieśnikam. Jon zastavaŭsia na hetaj pasadzie da siaredziny 2002 h. — vidać, da taho času, pakul u Maskvie nie pierakanalisia, što Cichanaŭ sapraŭdnym kankurentam Ziuhanava nie stanie. I nasamreč, sproba zamianić Ziuhanava Cichanavym na Ch źjeździe KPRF była padaŭlenaja Miniustam RF, a sproby apošniaha, paśla jahonaha vyklučeńnia z partyi Ziuhanava, stvarać novyja kamunistyčnyja struktury zastalisia biasplonnyja (hł. los VKPB).
Što da Babiča, to jon tym časam atrymaŭ jašče bolš adkaznaje zadańnie: u listapadzie 2002 h. byŭ pryznačany staršynioj urada Čačenskaj respubliki, dzie na toj momant jašče praciahvałasia partyzanskaja vajna. Prabyŭ im da lutaha 2003 h. — usiaho 3 miesiacy. Ale z zadačaj spraviŭsia — 23 sakavika 2003 h. u Čačni byŭ praviedzieny refierendum pa novaj Kanstytucyi, zhodna ź jakoj respublika stałasia subjektam Rasiejskaj Fiederacyi.
Paśla hetaha adkaznaha i ryzykoŭnaha zadańnia — u Čačni možna było i zahinuć — byŭ adpraŭleny «na adahreŭ i adpačynak» u Dziarždumu RF. Prabyŭ deputatam Dziarždumy z 2003 pa 2011 h. A paśla atrymaŭ pryznačeńnie ŭ najvyšejšuju namienkłaturu — byŭ pryznačany Paŭnamocnym pradstaŭnikom prezidenta ŭ Pryvołžskaj fiederalnaj akruzie, a litaralna praz dva tydni staŭsia adnačasova i staršynioj Dziaržaŭnaj kamisii RF pa chimičnym razzbrajeńni. Heta značyć, adkaznym za chimzbroju RF — jak toje nam nahadała ciapier chimičnaja ataka ŭ Brytanii z užyvańniem «Navička».
Što ž adbyłosia ŭ rasijskim Pryvołžy padčas kuratarstva tam pałkoŭnika Babiča?
Baškartastan straciŭ pasadu prezidenta.
Były hubiernatar Nižaharodskaj vobłaści Barys Niamcoŭ byŭ zabity.
Hubiernatar Kiraŭskaj vobłaści Mikita Białych pierajechaŭ na «zonu».
Tatarstan straciŭ svoj asablivy status.
Kiraŭnik Respubliki Maryj Eł pierajechaŭ u śledčy izalatar. Śledam za im tudy adpraviŭsia ŭ śledčy izalatar kiraŭnik Udmurtyi.
U 2016 hodzie pałkoŭnika ŭžo sprabavali zrabić «dypłamatam». Jaho adpraŭlali pasłom va Ukrainu. Ukraina tady admoviłasia pryniać takoha pasła.
U pryncypie, chtości taki, jak Babič, małady, nadziejny i z FSB, moža pretendavać i na najvyšejšyja pasady. Navat, chto viedaje, čamu b i nie pierajemnikam Uładzimira Pucina? Jon ža namiakaŭ, što talenavityja kadry padrastajuć u pravincyi. Ale dla vialikaha rostu patrebnyja vialikija pośpiechi ŭ karjery, jakija apraŭdajuć taki vybar. Vialikija pośpiechi. Babič niehavarki, upeŭnieny ŭ sabie i šmat što prajšoŭ.
