Žonka bieraściejca, zabitaha ŭ Turcyi, asprečvaje viersiju tureckich ŚMI
19 vieraśnia bieraściejec Viktar Haładko razam z žonkaj i dziciom palacieŭ u adpačynak u Turcyju.
Čytajcie taksama: U tureckim hateli aficyjant zabiŭ turysta ź Biełarusi
Biełarusy spynilisia ŭ čatyrochzorkavym hateli u horadzie Turunč, paviedamlajuć tureckija ŚMI.
Viktar Haładko
Trahiedyja adbyłasia ŭ subotni viečar 23 vieraśnia. Tureckija haziety paviedamlajuć, što Viktar pajšoŭ u bar, dzie 17-hadovy aficyjant admoviŭsia jaho absłužyć. Paśla čaho zaviazałasia bojka, u jakoj turak udaryŭ biełarusa nažom. Viktar skanaŭ, zabojcu zatrymali.
Adnak, pa viersii siamji zahinułaha, usio było nie tak. Svajaki ŭžo źviazalisia z žonkaj Viktara, jakaja pakul znachodzicca ŭ Turcyi.
«Žonka Viktara, Julija, zastałasia spać u numary. Viktar vyrašyŭ vypić piva ŭ bary, — raspaviadajuć svajaki siamji. — I siarod nočy da Julii pryjšła adna z ruskich žančyn, što adpačyvali tam, kaža: pračynajsia, tvajho muža zabili!»
Pa słovach svajakoŭ, palicyja prahladała kamiery videanazirańnia.
Julija, žonka Viktara, śćviardžaje, što barmeny pili za stojkaj i admovilisia absłuhoŭvać jaje muža, chacia bar jašče pracavaŭ.
«Barmen sa svaimi dvuma naparnikami vypivali ŭ siabie za barnaj stojkaj. Kali muž padyšoŭ da barnaj stojki i štości paprasiŭ, hetamu barmenu niešta nie spadabałasia. Jon u adkaz niešta kryknuŭ na tureckaj — Viktar, viadoma, nie zrazumieŭ. Muž užo adychodziŭ ad barnaj stojki, kali toj barmen vyskačyŭ z nažom i napaŭ na jaho sa śpiny, usadziŭšy jamu nož ŭ bok, kala piačonki. Muž adrazu straciŭ prytomnaść. Chutkaja sprabavała štości zrabić na miescy, ale im nie ŭdałosia jaho vyratavać», — raspaviała «Našaj Nivie» žančyna.
Julija kaža, što spała ŭ numary ź dziciom u hety čas.
«U bary pracavała videakamiera. I dobra vidać, što ŭsie try barmeny vypivali tam. Pa kamierach było vidać, što moj muž ahresii nie prajaŭlaŭ, ruki nie raspuskaŭ, — pierakonvaje Julija. — Da taho ž usio bačyli turysty Ukrainy, ź jakimi jon siadzieŭ za stolikam».
Žančyna kaža, što Viktar chiba «vypiŭ, moža, kufal piva».
Ciapier Julii Haładko treba pryvieźci cieła muža ŭ Brest. Chutčej za ŭsio, ŭ čaćvier jana palacić u Biełaruś. «Vielmi dapamahaje biełaruskaje pasolstva i kiraŭnik turfirmy, dzie my zamaŭlali tur», — kaža Julija.
25 vieraśnia projdzie ci to dopyt, ci to sudovaje pasiadžeńnie pa spravie, na jakim barmen zmoža raspavieści svaju viersiju padziej. Praŭda, sama Julija nie choča na im prysutničać.
Viktaru Haładko było 28 hadoŭ. Jon pracavaŭ rabočym na Bresckim miasakambinacie. U jaho zastaŭsia 3-hadovy syn.
