U Šviecyi pamior dziciačy piśmieńnik Ulf Stark
Pamior dziciačy piśmieńnik i scenaryst Ulf Stark sa Šviecyi, paviedamlajuć infarmahienctvy.
Adznačajecca, što piśmieńnik pajšoŭ z žyćcia ŭ svaim domie ŭ Šviecyi paśla niepraciahłaj chvaroby. Praź miesiac, 12 lipienia, Starku pavinna było spoŭnicca 73 hady.
Litaratar naradziŭsia ŭ 1944 hodzie ŭ stalicy Šviecyi Stakholmie. Tvorčy šlach pačynaŭ u 60-ch hadach z darosłaj litaratury, a pieršuju dziciačuju knihu pad nazvaj «Pieter i čyrvonaja ptuška» vydaŭ u 1975 hodzie.
Taksama jaho piaru naležać tvory «Dzivaki i zanudy», «Kalady ŭ lesie», «Chaj tancujuć biełyja miadźviedzi», «Ci ŭmieješ ty śvistać, Jochana?», «Maja siastryčka — anioł» i inš. Praz svaje knihi piśmieńnik chacieŭ dastukacca da maładoha pakaleńnia, jakoje akunułasia ŭ śviet virtualnaj kamunikacyii hadžetaŭ, raskazać dzieciam prostuju iścinu pra toje, što žyćcio bieź siabroŭstva, lubovi, uzajemarazumieńnia i padtrymki biessensoŭnaje.
Ulf Stark ličyŭsia adnym z samych viadomych u śviecie dziciačych piśmieńnikaŭ, jon napisaŭ kala 30 knih. Tvory Starka byli pierakładzienyja bolš čym na 25 moŭ. Jaho nazyvajuć spadčyńnikam tradycyj Astryd Lindhren. Ulf Stark — łaŭreat mnostva litaraturnych premij.
