Narodny majstar Ivan Suprunčyk vysiek skulpturu čałavieka z kampjutaram zamiest hałavy
Stan sučasnaha śvietu chvaluje narodnaha majstra Biełarusi ź vioski Cierabličy Stolinskaha rajona nie mienš, čym zachavańnie spadčyny biełaruskaha naroda.
Pieršaja sprava karcina: kampjutar zamiest hałavy ŭ sučasnaha čałavieka
Mienavita vyniki nazirańniaŭ Ivana Pilipaviča za moładździu XXI stahodździa, za adnosinami pamiž ludźmi vylilisia ŭ karciny, zrazumieć sens jakich bieź fiłasofskaha padychodu nie atrymajecca.
— Kampjutar avałodaŭ čałaviekam, — kaža narodny majstar BiełarusiIvan Suprunčyk. — Usie znachodziacca ŭ jaho pałonie. Voś tamu i namalavaŭ sučasnaha čałavieka z kampjutaram zamiest hałavy.
Majstar zrabiŭ draŭlanyja skulptury sučasnych Adama i Jevy, u jakich taksama zamiest hałavy — zvyčajny kampjutar.
Baćki sučasnaha čałavieka taksama majuć zamiest hałavy kampjutary
Na nastupnaj karcinie, jakaja nosić nazvu na cierablickim dyjalekcie «Ostanović vred», majstar adlustravaŭ čałavieka, jaki pratknuŭ zvyčajnym kałkom kampjutar i nakiravaŭsia ź im da sonca, šukajučy ŭ jaho paratunku ad kampjutara.
Karcina ź simvaličnaj nazvaj «Ostanović vred»
Narodny majstar plonna pracuje. Letam hetaha hoda jon staŭ udzielnikam «Słavianskaha bazaru» ŭ Viciebsku i inšych mižnarodnych pleneraŭ i fiestyvalaŭ.
U svaich tvorach Ivan Suprunčyk adlustroŭvaje samyja roznyja značnyja padziei.
Ivan Suprunčyk tak ubačyŭ i pieradaŭ sustreču patryjarcha Maskoŭskaha i ŭsiaje Rusi Kiryła z papam Franciškam
Karciny Ivana Suprunčyka, u tym liku i zroblenyja ŭ hetym hodzie, možna ŭbačyć u muziei vioski Cierabličy
DAVIEDKA
Ivan Pilipavič Suprunčyk — narodny majstar Biełarusi, člen Biełaruskaha sajuza majstroŭ narodnaj tvorčaści, dyrektar Centra draŭlanaj skulptury vioski Cierabličy Stolinskaha rajona. Naradziŭsia 23 kastryčnika 1942 hoda ŭ v. Cierabličy Stolinskaha rajona Brescaj vobłaści. U 1980 hodzie skončyŭ Mahiloŭski biblijatečny technikum. Z 1969 — biblijatekar Cierablickaj viaskovaj biblijateki. Sa śniežnia 2007 — małodšy navukovy supracoŭnik muzieja draŭlanaj skulptury v. Cierabličy.
U 2001 atrymaŭ śpiecyjalnuju premiju prezidenta «Za duchoŭnaje adradžeńnie». U śniežni 2009 za vialiki asabisty ŭniosak u zachavańnie historyka-kulturnaj spadčyny prysvojena zvańnie «Hanarovy hramadzianin Stolinskaha rajona». U 2014 hodzie jamu prysvojena zvańnie «Hanarovy palašuk».
