Каб выканаць гадавы план па інфляцыі, урад хоча замарозіць цэны

У Беларусі да канца 2012 года можа быць уведзены мараторый на рост некаторых цэн і тарыфаў. Пра гэта заявіў першы віцэ-прэм’ер Уладзімір Сямашка на пасяджэнні Савета Міністраў.

«У мэтах безумоўнага выканання прагнозных параметраў па ўзроўні інфляцыі Міністэрству эканомікі да канца года неабходна ўвесці мараторый на павышэнне цэнаў і тарыфаў

па тых пазіцыях, якія не ўключаны ў графік», — сказаў Уладзімір Сямашка.

Закранаючы ў цэлым цэнавае рэгуляванне, ён падкрэсліў, што сітуацыя кантралюемая. Індэкс спажывецкіх цэн за студзень-верасень 2012 склаў 116,1%, або 1,8% у месяц. «У цэлым па выніках года інфляцыя не павінна перавысіць 19–22%, — сказаў першы віцэ-прэм’ер. —

Разам з тым неабгрунтаванае павышэнне ў некаторых выпадках заработнай платы стварае перадумовы для росту інфляцыі звыш прагнознага ўзроўню і можа паўплываць на канчатковы вынік».

Таму для безумоўнага выканання прагнозу па параметрах інфляцыі і плануецца да канца года замарозіць цэны і тарыфы па некаторых пазіцыях.

БелТА

Хочаш падзяліцца важнай інфармацыяй
ананімна і канфідэнцыйна? Пішыце рэдактару
«Нашай Нівы» ў ТГ