Новая місія МВФ пачала візіт у Мінск
Сёньня пачынаецца візыт у Менск чарговай місіі Міжнароднага валютнага фонду.
Сёньня пачынаецца візыт у Менск чарговай місіі МВФ, якая павінна скарэктаваць макраэканамічны прагноз для Беларусі на 2011–2015 гадыз улікам сьнежаньскіх дамоўленасьцяў па адзінай эканамічнай прасторы і цэн на нафту. Місія будзе працаваць у Менску да 2 лютага. Ці пойдзе гаворка пра новыя крэдыты для Беларусі?
Экспэрты МВФ павінны ацаніць уплыў новых дамоўленасьцяў з Расеяй на беларускую эканоміку і прадоўжыць кансультацыі зь беларускім бокам адносна эканамічнай палітыкі і структурных рэформаў. Як паведамілі «Свабодзе» ў сталым прадстаўніцтве МВФ у Менску, пытаньне пра новыя крэдыты абмяркоўваць не плянуецца.
Начальнік Упраўленьня інфармацыі Нацыянальнага банку Беларусі Анатоль Драздоў дадаў, што афіцыйнага звароту па новыя крэдыты не было.
У сталым прадстаўніцтве МВФ у Беларусі пакуль не камэнтуюць рэзалюцыю Эўрапарлямэнту ад 20 студзеня, у якой гаворыцца пра эканамічныя санкцыі да афіцыйнага Менску і замарозку любой фінансавай дапамогі, у тым ліку праз МВФ. Канчатковае рашэньне наконт гэтага будзе прынятае Радай Эўразьвязу напрыканцы студзеня.
