Як атрымаць бясплатны пляц пад будоўлю хаты
Каля 90 працоўных дзён сыходзіць на атрыманне зямельнага ўчастка ў «адным акне». Участкі ёсць у наяўнасці ў большасці рэгіёнаў.
Каля 90 працоўных дзён сыходзіць на атрыманне зямельнага ўчастка ў «адным акне». Участкі ёсць у наяўнасці ў большасці рэгіёнаў.
Грамадзянін, зацікаўлены ў атрыманні ўчастка, звяртаецца з заявай у адпаведны сельскі выканкам. З заявай падаецца пашпарт. Іншых дакументаў не патрабуецца.
Выканкам на працягу 3 дзён (тут і далей — працоўных дзён) запытвае ў адпаведных арганізацый дакументы, якіх не стае. Гэта даведка ЖЭСу пра займанае жылое памяшканне і склад сям’і заяўніка і даведка арганізацыі па дзяржрэгістрацыі нерухомай маёмасці аб адсутнасці (наяўнасці) правоў на аб’екты нерухомай маёмасці. Дакументы падаюцца ў выканкам за 5 дзён.
Калі рашэнне станоўчае, выканкам дае дазвол арганізацыі па землеўладкаванні на распрацоўку праекту адводу зямельнага ўчастка. Дазвол і дакументы накіроўваюцца ў арганізацыю па землеўладкаванні. Тая за 3 дні заключае з грамадзянінам дамову падраду на распрацоўку праекту.
У ёй прадугледжваюцца і працы па ўсталяванні межаў участка на мясцовасці, і паслугі па рэгістрацыі ўчастка і правоў на яго. На распрацоўку праекту адводу даецца 15 дзён з дня, калі грамадзянін аплачвае працы. За гэты час арганізацыя па землеўладкаванні абавязаная ўзгадніць праект з кіраўнікамі тэрытарыяльных органаў архітэктуры, Мінпрыроды, МНС, Дзяржсаннагляду.
Адначасова арганізацыя рыхтуе праект рашэння сельскага выканкама аб прадстаўленні зямельнага ўчастка, які ўзгоднены з праектам адводу зямельнага ўчастка, і перадае ўсе дакументы ў землеўпарадкавальную службу выканкама.
Там праект у 5 дзён разглядаецца і падаецца ў выканкам для прыняцця рашэння. Рашэнне выканкам прымае за 5 дзён.
Атрыманне ўчастка складаецца з двух этапаў: падрыхтоўка праекту і падрыхтоўка землеўпарадкавальнай справы па ўсталяванні межаў участка на мясцовасці. Першы этап сканчаецца, калі выканкам прымае рашэнне даць участак.
Пасля гэтага выканкам на працягу 3 дзён перадае сваё рашэнне з праектам адводу ўчастка зноў арганізацыі па землеўладкаванні — для ўсталявання межаў участка на мясцовасці і яго дзяржрэгістрацыі.
Тая на працягу 2 дзён пасля падрыхтоўкі землеўпарадкавальнай справы перадае заяву аб дзяржрэгістрацыі стварэння зямельнага ўчастка і ўзнікненні правоў на яго ў арганізацыю па дзяржрэгістрацыі. Не больш за 10 дзён займаюць дзяржрэгістрацыя стварэння ўчастка і перадача землеўпарадкавальнай справы і пасведчання аб дзяржрэгістрацыі ўчастка адпаведнай землеўпарадка¬вальнай службе. Далей дакументы перадаюцца ўласніку ўчастка.
Гэта значыць, грамадзянін першы раз звяртаецца ў мясцовы выканкам, каб падаць заяву, і другі — каб атрымаць гатовыя дакументы на ўчастак.
З моманту падачы заявы да моманту выдачы гатовых дакументаў праходзіць 82 дні.
За падрыхтоўку землеўпарадкавальнай справы грамадзянін плаціць 3 базавыя велічыні і 1 базавую велічыню — за рэгістрацыю. Разам атрымліваецца сума, эквівалентная прыкладна 30 EUR. Прычым ён адразу аплачвае ўсе паслугі, а потым выконваюцца працы.
