«Нёман» вырваў ачко ў БАТЭ
У нядзелю прайшлі матчы чацвёртага тура чэмпіянату Беларусі па футболе.
У нядзелю прайшлі матчы чацвёртага тура чэмпіянату Беларусі па футболе.
Цэнтральным быў матч у Салігорску, дзе мясцовы «Шахцёр» прымаў нечаканага лідэра чэмпіянату «Віцебск». Каманда Эдуарда Малафеева пакуль не можа забіць больш за адзін мяч за гульню.
Адзіны гол «Шахцёра» ў гэтай гульне быў забіты Іванам Дзенісевічам на 77‑ай хвіліне. Але для перамогі «гарнякоў» гэтага аказалася мала, бо ўжо ў кампенсаваны час Руслан Усаў змог зраўняць лік — 1:1.
Барысаўскі БАТЭ таксама пакуль не можа знайсці леташнюю гульню. Другі матч запар чэмпіёны згулялі ў нулявую нічыю. На гэты раз дома з «Нёманам». Гродзенцы ж увогуле ў гэтым першынстве пакуль не забілі ніводнага мяча.
Яшчэ адна нулявая нічыя была зафіксаваная ў сустрэчы мінскага «Дынама» і наваполацкага «Нафтана».
Адзінай камандай, якая пакуль не набрала пунктаў застаецца мінскі «Партызан». У нядзелю каманда Румбуціса была разгромленая «Дняпром» — 0:3. У пераможцаў два галы на рахунку Андрэя Лясюка.
Прыемна здзіўляе бабруйская «Белшына». Каманда атрымала другую перамогу запар. На гэты раз бабруйчане перамаглі ў гасцях «Тарпеда» — 1:2.
Ну і ў апошнім матчы тура брэсцкае «Дынама» выйграла ў «Мінска» — 2:1. Гэта першая параза галоўнага трэнера гараджан Віталя Тараканава.
Турнірная табліца пасля чатырох тураў выглядае наступным чынам: «Віцебск», БАТЭ — па 8 пунктаў, «Нафтан», «Дынама» (Брэст), Мінск, «Дынама» (Мінск) — па 7, «Белшына», «Шахцёр» — па 6, «Дняпро» — 4, «Нёман» — 3, «Тарпеда» — 1, «Партызан» — 0.
Найлепшы бамбардзір Андрэй Лясюк («Дняпро») — 3 галы.
Наступны тур пройдзе ў суботу 24 красавіка. У Мінску пройдзе дэрбі паміж «Партызанам» і «Дынама».