Кітайцы купілі Volvo: мы зробім з яго тыгра
Кітай стане другім рынкам Volvo — абвясціла ўчора кітайская кампанія Geely пасля падпісання кантракту на набыццё шведскага аўтавытворцы. Кантракт быў падпісаны ў другой палове дня ў нядзелю ў штаб‑кватэры Volvo ў Гётэборгу.
За Volvo амерыканцы атрымаюць 1,8 млрд даляраў. Папярэдняе пагадненне аб продажы Volvo амерыканцы падпісалі з кітайцамі яшчэ ў снежні мінулага году, але да гэтага часу ўзгаднялі кошты і іншыя моманты кантракту.
Кітайцы падпісалі кантракт з адной з самых вядомых аўтамабільных кампаній у свеце, вытворцам прэстыжных аўтамабіляў, вядомым якасцю, бяспекай і інавацыйнымі тэхналогіямі.
У мінулым годзе кампанія Geely выпусціла 330 тысяч аўтамабіляў — не нашмат менш, чым заводы Volvo. З набыццём шведскай фірмы кітайская кампанія адразу падвоіць выпуск.
Чальцы рады дырэктараў Volvo некалькі дзён таму яшчэ былі супраць продажу кітайскай кампаніі, але ў суботу змянілі сваё меркаванне і падпісалі пагадненне. Прычыны змены рашэння не агалошваюцца.
Прадстаўнік Geely сказаў, што яны хочуць захаваць заводы Volvo ў Швецыі і Бельгіі. Але далейшае развіццё шведскага брэнду будзе скіраванае на забяспечанне новага заводу ў Кітаі, які будзе выпускаць да 300 тысяч аўтамабіляў на год. Столькі аўтамабіляў Volvo было прададзена ў мінулым годзе за межамі Швецыі.
