«Оскар» на Першым канале ўжывую
Упершыню ў гісторыі айчыннага тэлебачання на Першым канале адбудзецца прамая трансляцыя цырымоніі ўручэння амерыканскай кінапрэміі «Оскар», паведамляе прэс-служба Белтэлерадыёкампаніі.
8 сакавіка тэлегледачы канала змогуць убачыць усю цырымонію цалкам, пачатак ў 3.30. Для тых, хто не зможа паглядзець «Оскар-2010» ноччу, у вячэрнім эфіры 8 сакавіка будзе паказана тэлеверсія шоу. Каментаваць трансляцыю будзе кінакрытык Ігар Сукманаў.
82-ю па ліку цырымонію ўручэння кінапрэмій «Оскар» амерыканская тэлекампанія ABC будзе трансляваць на больш як 20 краін. Вядучымі цырымоніі стануць акцёры Алек Болдуін і Стыў Марцін.
Лідэрамі па ліку намінацый гэтага года сталі фільм «Аватар» Джэймса Кэмерана і «Уладар буры» Кэтрын Бігелоў — кожная з гэтых карцін прэтэндуе на дзевяць статуэтак.
Таццяна Дарашчонак, БелаПАН
Хочаш падзяліцца важнай інфармацыяй
ананімна і канфідэнцыйна?
Пішыце рэдактару
«Нашай Нівы» ў ТГ
