Даслаць навіну
Знайсці
24.01.2010 / 00:24 18

Змагарам за мараль у інтэрнеце: вучыце матчастку!

Наталля Пяткевіч падкінула аргументаў на карысць дзяржаўнага рэгулявання «беларускага сегмента». Піша Аляксандр Класкоўскі.

Высокая кіроўная асоба падкінула аргументаў на карысць дзяржаўнага рэгулявання інтэрнета. Ды такіх, што нібыта і язык не павернецца пярэчыць.

Гэта неабходна дзеля абароны маральнасці, аўтарскіх правоў ды правоў чалавека, заявіла на семінары ідэолагаў Наталля Пяткевіч, першая намесніца кіраўніка прэзідэнцкай адміністрацыі. Так, маўляў, і за мяжой робіцца.

Праваабаронцы, па ідэі, пасланыя ў накдаўн.

Барацьба з «памыйкай», версія 2.0

Гэта яўны апгрэйд матывацыі. Версія 2.0. І добра, што наша чынавенства асвойвае праваабарончую лексіку. Раней мы проста чулі: трэба нарэшце разабрацца з гэтай памыйкай!

Дарэчы, заўважана: памыйкай звычайна называюць інтэрнет людзі ад яго далёкія. Памятаеце, як вясковы герой песні Высоцкага ўпершыню трапіў у Вялікі тэатр: «Был в балете — мужики девок лапают…».

Так і тут: хтосьці падвядзе да манітора, пакажа, якія бываюць сайцікі — і ў неафіта вочы на лоб. Ну, а калі неафіт з паўнамоцтвамі — крычы гвалт! Чакай цыркуляра, знішчальную магутнасць якога найлепей вымяраць мегатонамі. За часамі СССР быў такі жарт наконт прапагандысцкай «міралюбнай палітыкі» камуністычнай імперыі: трэцяй сусветнай не будзе, але будзе такая барацьба за мір, што каменя на камені не застанецца.

Ніводзін прасунуты юзер Сеціва памыйкай не назаве. Для яго гэта — інструмент, магутны, творчы. Кухонны нож таксама інструмент. Так, яго можа скарыстаць і злачынца. Дык што, прадаваць па ліцэнзіі?

Сеціву ж, калі коратка пераказваць нашумелы праект указа, фактычна хочуць накінуць татальнае ліцэнзаванне. Розных рэсурсаў, інтэрнэт-медый і нават персанальнага доступу. У інтэрнэт-кавярню без пашпарта не сунешся. Дык гэта правы чалавека ці паліцэйская дзяржава?

«Облико морале»

Што ж да маралі, за яе сапраўды трэба змагацца. Але якімі метадамі? Нашто паліць хату, каб падсмажыць яечню?

Так, дзяцей варта агароджваць ад распусты. Гэтак жа, як і ад запалак, тых самых вострых нажоў, таблетак. Але з гэтай задачай элементарна спраўляюцца на ўзроўні сям’і. Кладуць на вышэйшую паліцу — і ўся праблема. Ніхто з бацькоў не заклікае спыніць выпуск запалак. Што ж да Сеціва, то распрацоўшчыкі цыркуляраў відавочна ўпэўненыя, што найлепшы сродак ад перхаці — гільятына.

Між тым

блакаваць доступ да сумнеўных рэсурсаў, фільтраваць кантэнт ад бруду таксама элементарна можна на узроўні асобна ўзятага хатняга камп’ютэра. Гэта як фільтр для вады. Кажучы мовай вайсковага прапаршчыка: вучыце матчастку!

Дзеля айца і сына…

Апалчыліся супраць распусты ў Сеціве і некаторыя дзеячы беларускай праваслаўнай царквы. Але зноў жа пытанне: ці ўсе святыя айцы добра ведаюць матчастку? Бо іх прапановы надта ж тапорныя.

Дарэчы, каталіцкая царква выглядае ў гэтым сэнсе куды болей прагрэсіўна. Не прайграць бы канкурэнцыю, панове іерархі! Хаця дзеля справядлівасці дадамо, што патрыярх маскоўскі артыкулюе куды болей ліберальныя погляды на інтэрнет. Няўжо БПЦ хоча выглядаць на гэтым тле апірышчам абскурантызму?

І яшчэ адно прагматычнае меркаванне для іерархаў: такі падыход наўрад ці пашырыць сімпатыі да праваслаўя сярод моладзі. Паству страціце!

Зрэшты, гэта ведамасная праблема. А вось тое, што

сеціўнымі «откровениями» святых айцоў пачнуць размахваць, нібыта булавой, чыноўныя змагары з іншадумствам, — гэта як піць даць. Мы ж, так бы мовіць, дзеля айца і сына…

Адэпты ачышчэння сеціва ад «скверны», праўду сказаць, адхрышчваюцца ад падазрэнняў у прасоўванні палітычнай цэнзуры. Крый божа, толькі дзеля маральнасці! Аднак пры гэтым спічрайтэры чамусьці ўкладаюць у вусны мітрапаліта апеляцыю да кітайскага досведу.

Але каму як не святым айцам ведаць, што добрымі намерамі мосціцца дарога ў пекла. Кітайскі досвед — гэта пекла для свабоды сеціўнай думкі.

Што характэрна — менавіта пад маркай змагання з распустай ды злачыннасцю.

На каго пастка?

Між тым міліцыя ды спецслужбы і так маюць цэлы арсенал законаў ды метадаў, каб вывуджваць у Сеціве тэрарыстаў, порнадзялкоў і падобную брацію. Што і робяць дастаткова паспяхова.

А вось рэгістрацыя вэб-СМІ — ідэфікс нашых дзяржаўных мужоў і дам — дапаможа тут як хваробе кашаль. Бо вэб-СМІ такой брыдотай не займаюцца.

Аматары ж брудных спраў — паўтару каторы раз — не стануць у чаргу па ліцэнзіі перад дзвярыма Мінінфарма. Пастка чакае нармальных журналістаў. Дык без дурняў: каго шчаміць сабраліся, панове?

Скажуць: ну, а хіба ўсе інфармацыйныя вэб-рэсурсы белыя ды пухнатыя? Так, варта пагадзіцца: свабода слова, як і любая свабода, вымагае адказнасці. Напрыклад, абарона аўтарскага права для Сеціва сапраўды асабліва актуальная: крадуць кантэнт, саб-бакі! Але тут трэба проста скарыстоўваць дзейныя законы. Вучыце матчастку!

Далей, у інтэрнеце сапраўды багата хамства і бескультур’я. Але, як правіла, на форумах. Праблема вырашаецца праз мадэрацыю. У гэтым сэнсе многія заходнія рэсурсы дзейнічаюць болей прынцыпова і тэхналагічна. Трэба пераймаць і нашым. Таксама вучыце матчастку.

Бываюць канфлікты з прафесійнай этыкай і у асобных вэб-медый. Але і тут

развітыя дэмакратыі выпрацавалі нармальны, дзейсны механізм. Ён тычыцца усіх СМІ і называецца самарэгуляваннем. Адмысловыя адмудсмены і рады па этыцы разбіраюць грубыя фолы і выносяць вердыкты.

Заўважце: чыноўнік з адміністрацыйнай сякерай адпачывае. А эфект большы, і правы са свабодамі пачуваюцца нармальна.

Сон розуму спараджае пачвараў

І дазвольце наіўны абзац. Калі спадарыня Пяткевіч мае на ўвазе менавіта такі замежны досвед, а не вэб-душылаўку асобных азіяцкіх рэжымаў, то давайце супрацоўнічаць. БАЖ даўно ўзняў голас за этыку ў Сеціве, распачаў кампанію «Чысты Байнет». Падтрымайце!

Давайце супольна адукаваць і вэб-пісьменнікаў усіх масцяў, і наша чынавенства, і нават святых айцоў, калі захочуць.

Каб найперш вучылі матчастку — тонкі механізм Павуціння, метады нейтралізацыі сапраўдных пагроз, а не іншадумства, лепшы сусветны досвед самарэгулявання гэтай цудоўнай вынаходкі чалавечага розуму.

Тое, што многія айчынныя чыноўнікі не маюць доступу да інтэрнета ці маюць з камарову дзюбу, не лезе ні ў якія вароты. Сон розуму спараджае пачвараў.

Увядзіце ў атэстацыю кадраў новыя крытэры: каб кожны быў і прасунутым юзерам. Тады ніводзін не параўнае інтэрнэт са сметніцай. І рукі так свярбець не будуць.

А галоўнае,

стане зразумела: гэта рэч, якую не закілзаеш, нават калі патраціць на віртуальную аброць болей грошай, чым на АЭС. Вучыце матчастку!

Аляксандр Класкоўскі, baj.by

0
Салдат Швейх / адказаць
25.01.2010 / 09:47
2 Аляксандр Класкоўскі + 1000!!! Адносна рэгуляваньня так сама зазначу, што менавіта непісьменнаць тых самых профі, які такі павінны былі б быць профі, і выкідвае на паверхню міфы пра тое, што ўзмахам рукі можна "спыніць" інтэрнэт. Дзякуй аўтару, ахайныя палічкі спадабаліся!
0
Алесь Манцэвіч / адказаць
25.01.2010 / 16:14
Андрэю Мельнікаву Няўжо адмаўленне існавання бога тоеснае камфортнасці ў брыдоце і брудзе? Пытанне для мяне, як той казаў, рытарычнае.
0
Андрэй Мельнікаў / адказаць
25.01.2010 / 17:01
Рады, спадар Манцэвіч, Вашае пытанне прымусіла задумацца. Асабіста для мяне, дык шмат бруду я проста не бачыў і шмат мярзоты лічыў нармалёвай непераадольнай традыцыяй, пакуль не пачало даходзіць, што Бог ёсць. Гэта, як заўзяты палільшчык не можа зразумець свайго ванізму і атрутнасці для навакольных. Пры тым, што ён можа быць гераічнай асобай з пазітыўнымі соцустаноўкамі, а не жлабом, кар'ерыстам, зайздроснікам і мізантропам, якія навакольным шкодзяць свядома. Чамусь узгадаўся Салжаніцынскі "В круге первом". Пекла - то месца без Бога. То бок, усе, хто бяз Бога - у пекле. І можна весці сабе годна ў рознай ступені, і там шмат класных персанажаў і камфортнасць павышэй за ніжнія колы... Але, калі памятаеце, класныя персанажы працуюць там на злачынныя дзеянні злачыннай сыстэмы, прычым паспяхова. Свабода, то бок існаванне з Богам, дазваляе пазбягаць таго зла, якое ў коле першым рабілася неўсвядомлена, ці прынамсі ўсведамляць, што вось тут зло, а ня штось невядома якое невядома для чаго, але цікавае, дык хай жыве, і мы ім рабочы стол на кампе ўпрыгожым...
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
пїЅпїЅпїЅ пїЅпїЅпїЅпїЅпїЅ, пїЅпїЅпїЅпїЅпїЅпїЅпїЅпїЅпїЅ JavaScript пїЅ пїЅпїЅпїЅпїЅпїЅпїЅпїЅ пїЅпїЅпїЅпїЅпїЅпїЅ пїЅпїЅпїЅпїЅпїЅпїЅпїЅ, пїЅпїЅпїЅ пїЅпїЅпїЅпїЅпїЅ пїЅпїЅпїЅпїЅпїЅ пїЅ пїЅпїЅпїЅпїЅпїЅпїЅпїЅ
пїЅпїЅпїЅпїЅпїЅпїЅпїЅпїЅпїЅпїЅпїЅ...
Каб скарыстацца календаром, калі ласка, актывуйце JavaScript у наладах свайго браўзера
2018 2019 2020
ПН АЎ СР ЧЦ ПТ СБ НД
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30