Даслаць навіну
Знайсці
05.01.2010 / 22:52 37

У энергетычнай пятлі

Расійскае кіраўніцтва разлічвае на тры рэчы: 1) Лукашэнка не асмеліцца выйсці з Мытнага звязу; 2) не рызыкне пачаць сістэмныя рынкавыя рэформы; 3) не адважыцца на сапраўднае збліжэнне з Еўропай. Піша Аляксандр Класкоўскі.

«Братэрская інтэграцыя» без скандалаў не можа. Цяперашняя нафтавая спрэчка лішні раз гэта пацвярджае.

Лукашэнкавы крытыкі ўжо мільён разоў казалі: няма чаго было лезці ў пятлю саюзнай дзяржавы, даўно б жылі як людзі. Але скептыкі тут жа зразаюць: ну і далёка адышлі вашы прыбалты, напрыклад? Таксама ж у яме.

Пардон, але яма яме не роўная.

«Па малых адкрытых эканоміках крызіс б’е больш балюча, — адзначае эканаміст Яраслаў Раманчук. — Аднак давайце паглядзім, хто з якога ўзроўню падае».

Эксперт прыводзіць лічбы.

У 1989 годзе мы былі амаль удвая багацейшыя за літоўцаў, калі браць ВУП на душу насельніцтва паводле парытэту пакупной здольнасці: 6 667 долараў супраць 3 603. А вось у 2007-м прапорцыя выглядала ўжо як 10 841 супраць 17 575 не на карысць Беларусі.

Амаль у паўтара разы ($15 987) абагналі нас у гэтым плане і палякі, якія калісьці, памятаеце, скуплялі ў Беларусі ўсё запар, бо ў іх наогул быў голы васэр.

У Латвію, якую крызіс дзеўбануў асабліва балюча, цяпер укідаюць велізарныя грошы Еўразвяз ды МВФ. «Санацыя эканомікі там ідзе праз Еўрапейскі банк рэканструкцыі і развіцця, скандынаўскія банкі. Гэта ўжо і іх праблемы», — адзначае Яраслаў Раманчук. Іначай кажучы, краіны Балтыі паспелі ўбудавацца ў Еўропу дастаткова для таго, каб не згінуць па адной. У вялікай кампаніі заўсёды знойдзецца ратавальны план Б.

А вось аўтаркія гордай сінявокай рэспублікі вядзе да таго, што Расія метадычна намагаецца прыперці да сценкі.

Пасткі былі расстаўленыя яшчэ на мяжы 2006–2007 гадоў. Тады пасля нервовага высвятлення адносінаў Масква навязала Мінску два пагадненні — па газу і нафце.

Нафтавае пагадненне, разлічанае на тры гады, было варыянтам плаўнага закрыцця беларускага афшору: Масква распланавала паступовае скарачэнне мытнай зніжкі на чорнае золата. Цяпер прыйшоў час разлічвацца па поўнай праграме, але Мінск ўсё яшчэ не верыць, што банкет скончаны.

Аднак тая акалічнасць, што разбірацца з братэрскай Беларуссю ў нафтавым пытанні даручана віцэ-прэм’еру Сечыну, старому паплечніку Пуціна і па жыцці суроваму чалавеку, лішні раз паказвае: жарты прэч, беларускую нафтанку ужо «замовілі»!

Газавае пагадненне, заключанае з Мілерам «пад елачкай» за дзве хвіліны да наступлення 2007 года, — таксама не што іншае, як паэтапнае ўразанне гранту. Прадугледжаны паступовы выхад на еўрапейскія цэны да 2011 года.

Так, перыядычна робяцца нейкія палітычныя зніжкі, але сутнасці справы гэта не мяняе. Развязка і ў газавым пытанні непазбежная. Праз год у беларускага начальства будуць, мабыць, такія ж круглыя вочы: няўжо поза страуса зноў не спрацавала?

Як бачым, Расія метадычна рэалізуе свой план — дэталёва распісаную да 2011 года стратэгію эканамічнага націску на Беларусь. А тутэйшае начальства ўсё грувасціць саўковыя пяцігодкі росту ВУП ды спадзяецца на ўдачу.

Чарговай авантурай стала ўваходжанне ў мутны Мытны звяз. Цяпер аказалася, што надзеі на танныя энергарэсурсы пад новай шыльдай не пракочваюць.

І потым, гэта вялікая ілюзія, што вось, маўляў, скончыцца крызіс — і айчынныя тавары зноў шырокай плынню хлынуць на расійскі рынак. Расія стварыла шмат паралельных нашым вытворчасцяў. Прычым часта перакупляючы нашых жа яйкагаловых, як грубавата-любоўна называе іх беларускі афіцыйны лідэр. Карацей, наш тавар страчвае канкурэнтаздольнасць.

Але ж у Еўропу з гэнакім асартыментам тым болей не сунешся! Зачараванае кола. Як ні круці, а мы ж гандлявалі з буржуямі найперш прадуктамі перапрацоўкі таннай расійскай нафты. Крэмль ведае, у якое месца біць!

Чым яшчэ ратавацца? Разважанні галоўнага беларускага начальніка, што вось, маўляў, паўтара мільярда галадаючых у свеце ёсць гарантыяй попыту на прадукцыю нашага аграпраму, мякка кажучы, не вытрымліваюць крытыкі. У гэтых небарак няма грошай на магілёўскую тушонку. Каб трэці свет быў болей платаздольным — яго ўжо завалілі б харчамі заходнія фермеры.

Карацей, мы ў глыбокай яме. Ці была яна фатальнай?

«Масква найболей засцерагалася, што Беларусь пачне мадэрнізацыю, пакуль ідзе вялікі энергетычны грант, — гаворыць Раманчук. — Але «попрыгунья-стрекоза лето красное пропела».

Цяпер расійскае кіраўніцтва, на думку эксперта, разлічвае на тры рэчы: 1) Лукашэнка не асмеліцца выйсці з Мытнага звязу; 2) не рызыкне пачаць сістэмныя рынкавыя рэформы; 3) не адважыцца на сапраўднае збліжэнне з Еўропай.

Разважанні афіцыйнага лідэра на пераднавагодняй прэс-канферэнцыі (Мытны звяз улучна з новымі мытамі на аўто нам жудасна выгадны, рэформаў не хоча паспаліты люд, а Еўропе няма чаго гуляць у кошкі-мышкі) павінны былі ў гэтай сувязі парадаваць маскоўскіх стратэгаў. У сэнсе: куды ён дзенецца з падводнай лодкі!

Між тым

краіна апынулася ў энергетычнай пятлі. І будаўніцтва АЭС пры дапамозе Расіі можа толькі тужэй зацягнуць гэтую пятлю. Усе ж іранска-венесуэльскія альтэрнатывы пакуль што несур’ёзныя. А па балта-чорнаморскай восі сапраўдную энергетычную гульню Мінск, лічы, і не пачынаў.

Ці ацвярэзіў тутэйшае начальства навагодні бліцкрыг Сечына? Бо энергетычная міні-вайна ўсё ж выбухнула, пакуль народ піў шампанскае ды жаваў аліўе. Нягледзячы на нязграбна-бадзёрыя заявы беларускіх нафтачыноўнікаў, што ўсё ціп-топ, — факт тое, што 1 і 2 студзеня сыравіны нашым НПЗ Расія не давала. Першы званочак.

Што цяпер думае афіцыйны лідэр на актуальную тэму — як жыць далей, пакуль не вядома. Прэзідэнт Беларусі па добрай каляднай традыцыі спаборнічае ў хакей за прыз прэзідэнта Беларусі. ДзяржСМІ маўчаць або прадукуюць дзіцячы лепет: адмашкі мачыць імперыю пакуль не атрымлівалі.

На думку Раманчука, наверсе ўсе ў элементарнай разгубленасці: «Плана Б ні ў каго не было».

Па вялікім рахунку, вось ужо 15 гадоў краіна так і боўтаецца без плана Б, разлічваючы толькі на шанцаванне. Дакладней, план Б палягае ў тым, каб у выпадку чаго ўчыніць скандал («Я патрабую прадаўжэння банкета!») і тое-сёе ўсё ж выдзерці. Але гэта слабы план.

На прэс-канферэнцыі 30 снежня, разважаючы над урокамі 2009 года, Лукашэнка прызнаў: «Мадэрнізавацца трэба было хутчэй».

Ну хай бы сабе такую рэпліку кідала адсунутая у далёкі кут ад вагароў улады апазіцыя. А хто перашкаджаў хутчэй гэта рабіць высокаму начальству ў цалкам кіраванай, як з гонарам зазначаецца, краіне? Тут ужо ўсе магчымыя і немагчымыя паўнамоцтвы ў адных руках сабраныя.

Можа, якраз у гэтым і загваздка?

Аляксандр Класкоўскі, БелаПАН.

0
Станкевіч / адказаць
07.01.2010 / 15:59
"Тебе бы романы писать, начальник!" +++++++++++++++++++ Прыкладна так выказваліся некаторыя на пры канцы 80-х, калі чулі аб незалежнасьці Беларусі. :)) А потым некаторыя зь іх нават у БНФ запісаліся, так, Дімыч))))) Хто ж мае сумневы, што й раманы напішуць і вершы складуць (Кнехт) падзея ж будзе неардынарная! Расею - ды куды падалей!!! Пасьпееце шчэ пачытаць без акуляраў пра ўсё.:))
0
analitik / адказаць
15.01.2010 / 21:42
наступныя тымы будуцьі цікавымі ў год выбараў. 1.У Беларусі цяпер высокая сацыяльная напружанасць паміж многімі грамадзянамі і адпаведнымі дзяржаўнымі установамі. Апошняя кампанія са страхойкай кватэр у Фрунзенскім раёне Мінску. Людзі сваімі дзеяннямі вымусілі выйсці на дзяржаўнае тэлебачанне начальніка аддела жыллёвай гаспадаркі Мінжылкамунгасу і адказаць усім, што ён ня ведае пастановы Мінгарвыканкаму аб абавязковым страхаванні(ён сказаў праўду). Тэма актуальная для сотняў тысяч мінчан, а БАЖ там ня ўбачыў нічога цікавага. Карупцыйны душок у дзеяннях камунальных "чынуш" уявіла "КП у Беларусі", але атрымала за подпісам аднага з "чынуш" адпіску і супакоілася. А калі б "хлопчыкі" і "дзяўчаткі" з БАЖ узялі ў рукі "жыроўкі" сваіх бацькоў-кватэраўласнікаў і правялі дакументальнае расследаванне па структуры ўсіх артыкулаў "жыроўкі"(расследаванне трэба вясці на працягу некалькіх месяцаў сумесна з юрыстамі-практыкамі і з тымі, хто ведае пра калькуляцыі, сметы і г.д.) яны б убачылі, што беларуская камунальная гаспадарка - гэта "мутная вада", якую зрабілі затратнай і пад выглядам страхавання падуладныя страхаўшчыкі ствараюць базу для адабрання ў ўласнікаў іх кватэр... "Беларуская "МММ" у камунальнай гаспадарцы"- чым ня тэма для БАЖ? 2. Зямля Мінска. Як ёй "гандлююць" высокія "чынушы"? Чаму БАЖ і "Народная воля" не пажадалі ўнікаць у канфлікт паміж жыхарамі мінскага мкр "Сухарава-2" і уладнымі "чынушамі-камерсантамі"? Вяршкі гэтага канфлікту убачыў карэспандэнт Белсату ў студзені 2010г. Пры гэтым жанчына з Белсату (незарэгістраванага ў Беларусі) нікому не "тыкала" сваш пасведчанне. Яе прыкрылі жыхары Сухарава-2, калі сказалі, што прынеслі сваю відыёапаратуру і будуць самі фіксаваць кожнае слова і кожны твар на сходзе ў школе №217 г.Мінску. І яны ведаюць чаму трэба рабіць толькі так: а) РА паляўнічых і рыбаловаў - гэта пазапрацоўная партыя наменклатуры; яе раённыя і г.д. структуры ўзначальваюць раённыя старшыні, яна цесна супрацоўнічае с МУС РБ; б) Беларусбанк акумуліраваў сродкі пенсіянераў, частку зарплаты і г.д. Калі узяць суму (а+б),то атрымаем механізм камерцыйнай дзейнасці наменклатуры ў Беларусі. Белсат не паказаў выказванні прадстаўніка Беларусбанку ў Сухарава: а ў яго выказваннях сутнасць: фінансаванне камерцыйнага будаўніцтва - "проізводственная необходімость" для Беларусбанку. (А+Б) галоўны заказчык ушчыльненя жылых дамоў у Мінску і "ушчыльняць" ён будзе без адпаведнай рэканструкцыі інжынерных сістэм і ня улічваць камунальныя і іншыя нязручнасці жыхароў, якіх (А+Б) "ушчыльняе"... Шаноўныя прадстаўнікі "крапивного семени", якіх аб'ядноўвае БАЖ, сёння мала крапівой масажыраваць наменклатурную шкуру, трэба знутры паказваць яе "шкурность". Не падстащляйце БАЖ ! 3. РГА "БЕЛАЯ РУСЬ": Радзькоў і Со. Хто яны? Не матэматык, не палітык, не камісар і не міністр; так, у авантурнай гэтай справе ён старшыня-авантурыст... Куды цянуць беларускую наменклатуру і наменклатурных ідыёлагаў?
0
Кейстут / адказаць
22.01.2010 / 23:20
У папяровай версіі лічбы па ВУП так і не зьмянілі, ну і кандовая ж у вас прапаганда, таварышы..
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
пїЅпїЅпїЅ пїЅпїЅпїЅпїЅпїЅ, пїЅпїЅпїЅпїЅпїЅпїЅпїЅпїЅпїЅ JavaScript пїЅ пїЅпїЅпїЅпїЅпїЅпїЅпїЅ пїЅпїЅпїЅпїЅпїЅпїЅ пїЅпїЅпїЅпїЅпїЅпїЅпїЅ, пїЅпїЅпїЅ пїЅпїЅпїЅпїЅпїЅ пїЅпїЅпїЅпїЅпїЅ пїЅ пїЅпїЅпїЅпїЅпїЅпїЅпїЅ
пїЅпїЅпїЅпїЅпїЅпїЅпїЅпїЅпїЅпїЅпїЅ...
Каб скарыстацца календаром, калі ласка, актывуйце JavaScript у наладах свайго браўзера
2018 2019 2020
ПН АЎ СР ЧЦ ПТ СБ НД
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30