У 1990-я ў небе ляталі беларускія бел-чырвона-белыя самалёты, але не «Белавія». ФОТА і тлумачэнні
Беларусы прызвычаіліся, што айчынная авіяцыя — гэта выключна дзяржаўны манапаліст «Белавія». Але так было не заўсёды. У 1990-я ўзнікла адразу некалькі прыватных авіякампаній. Сярод іх — «Белэйр».
Наогул, у свеце ведаюць іншую кампанію з такой назвай. Гаворка пра швейцарскую кампанію Belair Airlines AG (сцісла Belair), якая ўзнікла амаль сто гадоў таму і спыніла існаванне ў 2017-м.
Беларуская кампанія, што «пазычыла» іх назву, з'явілася ў першы год пасля абвяшчэння незалежнасці — у сярэдзіне 1992-га — і стала першым канкурэнтам цяперашняй «Белавіі». Яе заснавальнікам стаў бізнэсмен Яўген Кузьмін.
Belair, што базіравалася ў аэрапорце «Мінск-2», спецыялізавалася на чартарных рэйсах — і пасажырскіх, і грузавых. Яна мела самалёты трох тыпаў — два грузавыя Іл-76, два Ту-134 і адзін Як-40.
Адметнасцю кампаніі стаў бел-чырвона-белы колер самалётаў з элементамі нацыянальных узораў.
Ілы выкарыстоўваліся ў аперацыях ААН у Югаславіі, дзе ў 1990-я ішла грамадзянская вайна. Адзін з гэтых самалётаў быў пашкоджаны ў Сараеве пры пасадцы: меліся праблемы з насавой часткай і пярэдняй часткай шасі. Але зону, куды трапіў самалёт, абстрэльвалі сербскія снайперы, таму Іл вырашылі не эвакуіраваць і не аднаўляць. У пачатку наступнага дзесяцігоддзя яго ўтылізавалі.
Сітуацыя ў Сараеве адмоўна паўплывала на бізнэс. Але тое быў не галоўны фактар. Авіяперавозкі тады былі не так запатрабаваныя ў насельніцтва, як цяпер. Ды і беларусы не былі надта багатымі. Сваю ролю адыграла і стаўка дзяржавы на «Белавія».
У 1999-м кампанія спыніла існаванне, а Кузьмін перайшоў на працу ў «Белавія».
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)