Лукашэнка: Калі трэба будзе, пабудуем і другую АЭС
Аляксандр Лукашэнка лічыць, што за атамнымі электрастанцыямі будучыня, паколькі ўвесь свет пераходзіць з нафтапрадуктаў на электрычнасць. Пры неабходнасці ў дадатак да Беларускай АЭС могуць пабудаваць і другую.
БелТА
Аб гэтым ён заявіў на сустрэчы з членамі ўрада, перадае БелТА.
«Трэба будзе-пабудуем і другую атамную станцыю. У гэтым уся перспектыва. Нас увесь час крытыкаваў Захад, асабліва нашы суседзі: «Ах, станцыя, бяспека і іншае». А самі запланавалі будаўніцтва станцый», — адзначыў Лукашэнка.
Паводле яго слоў, раней «Літва ледзь прамаўляла гэта», а цяпер ужо і сама задумалася аб будаўніцтве.
«І Польшча плануе будаваць, усе астатнія або будуюць, ці ўжо пабудавалі. Таму атамная энергія — гэта будучыня. І, дзякуй богу, што мы ў свой час узяліся за гэтую праблему, адгадалі, што трэба гэтым займацца. Гэта перспектыва, высокія тэхналогіі», - дадаў Лукашэнка.