У Гомелі затрымлівалі больш за 10 работнікаў «Беларуснафты». Што вядома
На мінулым тыдні былі затрыманыя некалькі работнікаў «Беларуснафты», паведамілі Tut.by калегі затрыманых.
— Усяго 15 чалавек было затрымана. Некаторых проста з працы забралі. У іх прайшлі ператрусы. Многіх адпусцілі, але перад гэтым склалі адміністрацыйныя пратаколы. У аднаго работніка — «крыміналка», — распавялі калегі.
Гаворка ідзе аб работніках падраздзялення сейсмаразведкі. За што менавіта затрымалі і судзілі людзей, пакуль незразумела. Калегі мяркуюць, што мужчыны размаўлялі ў нефармальным карпаратыўным чаце, дзе свабодна выказвалі свае думкі з нагоды грамадска-палітычнай абстаноўкі ў краіне, — і «сказалі нешта не тое».
Нагадаем, два дні таму стала вядома пра затрыманне работніка «Беларуснафты» Дзмітрыя Грышчанкі, які ў кастрычніку мінулага года запісаў відэазварот ад імя супрацоўнікаў прадпрыемства супраць гвалту. Па словах сяброў Дзмітрыя, затрымалі яго нібыта за «спробу схавацца», хоць пад падпіскай аб нявыездзе ён не быў. Месяц таму ў Дзмітрыя дома праводзіўся ператрус. Але тады ніякіх прэтэнзій да яго з боку сілавікоў не было, яго не затрымлівалі, і ён працягваў хадзіць на працу.
Сёння Tut.by ад знаёмых Дзмітрыя стала вядома, што яго затрымалі па падазрэнні ў арганізацыі беспарадкаў. Сёння павінны альбо вызваліць яго, альбо выставіць яму абвінавачанне.
Каментароў ад прадпрыемства, як сказалі Tut.by у «Беларуснафце», не будзе.
У верасні работнік «Беларуснафты» Сяргей Краўчанка з Рэчыцы запісаў відэазварот да сваіх калегаў. У ім ён заявіў, што мае намер сысці на страйк. «Не хачу сваімі падаткамі карміць людзей, якія нас збіваюць», — патлумачыў свае планы Сяргей. Аднак па факце страйкаваць не атрымалася. Праз некаторы час пасля таго, як быў апублікаваны відэазварот, Сяргей разам з сям'ёй з'ехаў з краіны. Мужчына кажа, што гэта прыйшлося зрабіць з-за боязі за сябе і сваіх родных і на тое былі падставы.
26 кастрычніка 2020 года, у дзень агульнанацыянальнай забастоўкі, шэсць супрацоўнікаў упраўлення прамыслова-геафізічных работ запісалі відэазварот, у якім выказалі пратэст супраць гвалту і беззаконня, якое яны назіралі ў сваёй краіне. Праз гадзіну пасля апублікавання роліка ў Рэчыцу з Гомеля прыехалі кіраўнікі прадпрыемства і адбылася сур'ёзная размова. Работнікаў прасілі «абвергнуць свой учынак». Але яны былі непахісныя і далі зразумець, што ад сваёй грамадзянскай пазіцыі адмаўляцца не маюць намеру. Неўзабаве мужчын звольнілі. Некаторым прыйшлося з'ехаць з краіны.
