«Мярзотная хлусня ва ўсіх сферах жыцця»: Чубайс патлумачыў прычыну нянавісці да савецкай улады
Спецпрадстаўнік прэзідэнта Расіі па сувязях з міжнароднымі арганізацыямі, былы віцэ-прэм'ер і экс-кіраўнік Адміністрацыі прэзідэнта Анатоль Чубайс у інтэрв'ю журналісту Віктару Лашаку патлумачыў прычыны сваёй «нянавісці да савецкай улады», піша РБК.
Анатоль Чубайс нарадзіўся ў 1955 годзе ў Барысаве ў сям'і вайскоўца, але хутка сям'я пераехала ва Украіну. Фота ТАСС
Позняя савецкая ўлада — гэта 18 гадоў «брэжнеўскага застою», якія змяніла «гонка на катафалках», заявіў Чубайс.
«Раніцай уключаеш радыё і чуеш радасны голас: «Добры дзень, дзеці! Піянерская зорка». <…> Але вось гэта мярзотная хлусня з першага да апошняга слова. 100% таго, што ты бачыш, чуеш, разумееш, чытаеш, з'яўляецца хлуснёй. І ўсе выдатна разумеюць, што гэта хлусня. Яно так заведзена», — сказаў ён.
Па словах Чубайса, такая хлусня была ва ўсіх сферах жыцця СССР — у навінах, сходах працоўных або першамайскіх дэманстрацыях — і чым далей, тым прыводзіла да большай «агіды».
«Вось так прынята хлусіць, усім трэба хлусіць, і ў гэтай хлусні, калі ласка, жыві», — заявіў ён.
