Брытанія накіроўвае флот да вострава Джэрсі, каб абараніць ад французскай блакады
Брытанія накіравала да выспы Джэрсі ў праліве Ла-Манш вайсковы карабель HMS Severn з-за спрэчкі з Францыяй аб правах на рыбацтва і магчымай блакады вострава французскімі рыбакамі, піша ВВС.
Спрэчка ўзнікла з-за новых ліцэнзій на вылоўліванне рыбы, якія ўлады вострава ўводзяць у гэтай акваторыі пасля выхаду Брытаніі з Еўрасаюза.
Джэрсі — адзін з Нармандскіх астравоў плошчай 118 кв. км недалёка ад узбярэжжа Нармандыі. Фармальна ён не ўваходзіць у склад Вялікабрытаніі, але тут дзейнічае брытанская юрысдыкцыя («кароннае валоданне»).
У той жа час Францыя забяспечвае амаль усе патрэбы Джэрсі ў электрычнасці і цяпер пагражае адключыць востраў ад электразабеспячэння.
Французскія рыбакі лічаць ўвядзенне новых ліцэнзій несправядлівым і пагражаюць заблакаваць Сэнт-Геліер — ключавы порт на востраве.
Брытанскія ўлады вырашылі даслаць у гэты раён вартавы карабель HMS Severn, каб «назіраць за сітуацыяй».
Таксама ў брытанскім Міністэрстве абароны анансавалі, што да яго неўзабаве далучыцца яшчэ адзін ваенны карабель падобнага класу HMS Tamar.
Напярэдадні брытанскі прэм'ер-міністр Борыс Джонсан выказаў «непахісную падтрымку» Джэрсі, размешчанага за 22 км ад Францыі. Ён дадаў, што «любая блакада» будзе «абсалютна неапраўданай».
А кіраўнік рыбацкай галіны Нармандыі Дзімітры Рагоф запэўніў, што французскія рыбакі на самай справе не будуць блакаваць порт і ўвечары вернуцца ў Францыю, перадае AFP.
У той жа час яны плануюць правесці мірны пратэст.
