Фізічная нагрузка пасля кавіду: важна правільна яе дазіраваць
Калі вы нядаўна перажылі кавід або пакутуеце ад яго наступстваў, напэўна, вы жадаеце максімальна хутка вярнуцца да звычайнага жыцця. Шмат для каго часткай такога жыцця з’яўляецца фізічная нагрузка. Зразумела, фізічная актыўнасць — гэта вельмі карысна, але важна правільна яе дазіраваць падчас аднаўлення пасля хваробы.
Фота pixabay.com
Чалавеку, які яшчэ адчувае сімптомы кавіду, лепей адкласці любую фізічную нагрузку да іх знікнення, звычайна для гэтага трэба пачакаць 10—14 дзён. Тым, хто мае станоўчы рэзультат тэста на кавід, але не адчувае сімптомаў, таксама лепей адпачыць ад нагрузкі не менш за 10 дзён. Заняткі спортам ці фітнесам падчас вострага перыяду хваробы могуць пагоршыць стан ці падоўжыць час наяўнасці сімптомаў, папярэджвае HuffPost.
Першая фізічная нагрузка пасля кавіду павінна быць спакойнай. Можна пачынаць з прагулак, ёгі, павольнай язды на ровары або плавання. Калі вам падабаюцца сілавыя трэніроўкі, пачынайце з трэніровак з вагой цела або з лягчэйшай магчымай дадатковай вагой. Таксама варта пачынаць з мінімальнай колькасці паўтарэнняў практыкаванняў і выбіраць паступовы тэмп вяртання да звычайнай нагрузкі.
Вельмі важна пастаянна сачыць за станам здароўя падчас трэніровак. Калі вы маеце нейкі з наступных сімптомаў, лепей спыніць практыкаванні і, магчыма, звярнуцца да доктара:
- боль у грудзях або тахікардыя
- занадта доўгае аднаўленне нармальнага рытму сэрца пасля нагрузкі
- задышка або іншыя цяжкасці з дыханнем
- занадта моцнае адчуванне стомленасці
- прыпухласці канцавін і болі ў цягліцах
- страта прытомнасці
- тунэльны зрок або страта зроку
- ліхаманка
Прынцып паступовага вяртання да трэніровак дзейнічае і для тых людзей, хто перажывае наступствы кавіду. Можа быць цяжка на нейкі час адмовіцца ад трэніровак, але варта скарыстацца гэтым часам для іншых карысных для здароўя і фізічных паказчыкаў рэчаў. Напрыклад, можна звярнуць увагу на сваё харчаванне і тое, колькі вады вы ўжываеце, а таксама на зніжэнне ўзроўню стрэсу.
