Улады Японіі не выключаюць поўнай адмены Алімпіяды ў Токіа
Улады Японіі не выключаюць магчымасць адмены правядзення Алімпійскіх гульняў у Токіа летам 2021 года. Пра гэта паведаміў генеральны сакратар кіруючай Ліберальна-дэмакратычнай партыі Тасіхіра Ніка, перадае РБК са спасылкай на Reuters.
Паводле яго слоў, калі эпідэміялагічная сітуацыя пагоршыцца і рост колькасці заражаных COVID-19 працягнецца, «гэта [правядзенне Алімпіяды] сапраўды стане немагчымым, то прыйдзецца адмовіцца ад яе».
Такійская Алімпіяда павінна была прайсці з 24 ліпеня па 9 жніўня 2020 года, аднак з-за пандэміі каранавіруса ўрад экс-прэм'ера Японіі Сіндза Абэ разам з МАК вырашылі перанесці гульні на 2021 год.
Сёлета Алімпійскія Гульні павінны прайсці з 23 ліпеня па 8 жніўня. Гульні па рашэнні японскіх уладаў пройдуць без замежных заўзятараў. Міністр, адказны за правядзенне вакцынацыі, Тара Кона таксама не выключаў, што гульні прыйдзецца праводзіць цалкам без гледачоў.