Алексіевіч піша кнігу пра падзеі ў Беларусі. «Я ўражаная, як хутка зноў запрацавала сталінская машына»
Сьвятлана Алексіевіч заявіла, што піша кнігу пра падзеі ў Беларусі, якія адбываюцца пасьля прэзыдэнцкіх выбараў. Пра гэта яна сказала ў інтэрвію нямецкай газэце Süddeutsche Zeitung, піша «Свабода».
«Мы хочам стварыць незалежную, квітнеючую краіну. Але як? Мы жывём паміж дзьвюма небясьпекамі: Лукашэнкам і Расеяй, — сказала Алексіевіч у інтэрвію. — Ведаеце, што кажуць людзі, калі я ў іх пытаюся, як ім жывецца ў Беларусі? «Сьвятлана, мы жывём пад акупацыяй».
«Я была ўражаная тым, як хутка зноў запрацавала сталінская машына, — кажа Алексіевіч. — Ніхто нічога не забыўся. Паўсюль зьявіліся стукачы, мясцовыя падразьдзяленьні КДБ працуюць поўнай хадой. Лекар даносіць на свайго кіраўніка, яго звальняюць, а даносчык атрымлівае ягоную пасаду. Тэрор 1937 году ў чыстым выглядзе».
Беларуская нобэлеўская ляўрэатка знаходзіцца ў Нямеччыне зь верасьня 2020 на запрашэньне Нямецкай службы акадэмічных абменаў.
