На Netflix выйдзе серыял, прадзюсарамі якога сталі прынц Гары і Меган Маркл
Стрымінгавы сэрвіс Netflix анансаваў выхад дакументальнага серыяла, які стане першым прадзюсарскім вопытам Гары і Меган.
Фота Wikimedia Commons
Дакументальны праект «Сэрца непакорных» («Heart of Invictus») распавядзе пра ўдзельнікаў «Гульняў непакорных» (Invictus Games), якія адбудуцца ў Гаазе ў 2022 годзе.
Прынц Гары заснаваў «Гульні непакорных» у 2014 годзе. Гэта міжнародныя спартыўныя спаборніцтвы для ваенных, якія сталі інвалідамі. Спаборніцтвы ўключаюць у сябе веславанне, баскетбол на вазках і валейбол седзячы.
У цэнтры сюжэта — жыццё спартсменаў, якія раней былі ваеннымі, падчас падрыхтоўкі да спаборніцтваў.
Прынц Гары будзе выконваць абавязкі прадзюсара, а таксама з’явіцца ў некаторых сцэнах серыяла, паведамляе CNN.
Здымкай серыяла займаецца прадзюсарскі цэнтр Archewell сумесна з відэасэрвісам Netflix. Над праектам таксама працуюць рэжысёр Арланда фон Айзіндэль і прадзюсарка Джаана Натасегара.
