Польскай актывістцы Марыне Цішкоўскай выставілі абвінавачанне
1 красавіка яе дапыталі па крымінальнай справе, заведзенай Генпракуратурай Беларусі па арт. 130 («распальванне рэлігійнай і нацыянальнай варожасці і рэабілітацыя нацызму») і выставілі афіцыйныя абвінавачанні па гэтым артыкуле, піша Радыё Свабода.
Пракурор не змяніў меры стрымання і пакінуў абвінавачаную пад вартай.
Інфармацыя пра абвінавачанне Марыі Цішкоўскай, на думку непрызнанага Саюза палякаў, можа сведчыць пра тое, што падобныя абвінавачанні выставяць і іншым актывістам арганізацыі, якія таксама знаходзяцца пад вартай у Мінску на вуліцы Валадарскага.
Там утрымліваюць кіраўніцу СПБ Анжаліку Борыс і сябраў Галоўнай управы Ірэну Бярнацкую і Анджэя Пачобута.
Марыне Цішкоўскай 54 гады. Жыве ў Ваўкавыску. Замужам, у яе двое дзяцей і двое ўнукаў. Узначальвае аддзел незарэгістраванага СПБ у Ваўкавыску цягам 7 гадоў.
Як расказаў журналіст Анджэй Пісальнік, галоўнай актыўнасцю ваўкавыскага аддзела быў догляд польскіх вайсковых могілак у Ваўкавыску, дзе пахаваныя польскія жаўнеры вайны 1920 года. Цішкоўская разам з паплечнікамі ўтрымліваюць могілкі ва ўзорным стане, рэгулярна іх рамантуюць. У Ваўкавыску на базе аддзела СПБ працуе Польская грамадская школа. Пры ёй дзейнічае гарцэрская дружына «Шэрыя ваўкі».