Лекі ад кавіду паказалі шматабяцальныя вынікі
Эксперыментальны прэпарат назвалі мольнупіравір (molnupiravir).
Фота Depositphotos.com
Стваральнікі эксперыментальнага прэпарату ад кавіду заявілі, што таблеткі далі станоўчы вынік падчас даследаванняў.
Таблеткі распрацоўваюць амерыканскія фармацэўтычныя кампаніі Ridgeback Biotherapeutics LP і Merck. Лекі значна аслабілі сімптомы каранавіруса на працягу 5 дзён падчас тэставых выпрабаванняў, піша The Wall Street Journal.
Даследаванні прэпарату працягваюцца. Калі і далей таблеткі будуць паказваць станоўчыя вынікі ў лячэнні людзей з кавідам, то гэты прэпарат стане эфектыўным метадам у барацьбе з пандэміяй і першым пераральным сродкам у лячэнні каранавіруса.
Эксперыментальны прэпарат назвалі мольнупіравір (molnupiravir). Ён можа адыграць важную ролю ў дапамозе пацыентам, якія маюць сімптомы кавіду, але могуць лячыцца дома.
Мольнупіравір атакуе не спайкавы бялок віруса, як гэта робяць іншыя супрацьвірусныя прэпараты, а тую частку віруса, якая дапамагае яму распаўсюджвацца ў арганізме.
Прэпарат прайшоў другую стадыю выпрабаванняў, у якіх узялі ўдзел 182 пацыенты, тэст на каранавірус якіх паказаў станоўчы вынік на працягу апошніх чатырох дзён перад выпрабаваннямі. Ніводны з пацыентаў не быў шпіталізаваны.
Валанцёры прымалі мольнупіравір два разы на дзень. У выніку праз пяць дзён тэсты паказалі адмоўны вынік у кожнага, хто прымаў прэпарат. 24% пацыентаў прымалі плацэба — іх тэст застаўся станоўчым.
Да канца гэтага месяца навукоўцы правядуць трэцюю стадыю даследаванняў, якія мусяць паказаць, ці дапамагаюць гэтыя таблеткі прадухіліць шпіталізацыі і смяротныя выпадкі.