Кангрэс дэмакратычных прафсаюзаў Беларусі выступіў супраць разрыву кантракта Yara з «Беларуськаліем»
Беларускі кангрэс дэмакратычных прафсаюзаў (БКДП) выступіў супраць прымусу нарвэскай кампаніі Yara International разарваць кантракт з ААТ «Беларуськалій, паведамляе Радыё Свабода.
У прынятай 3 сакавіка заяве выканаўчага камітэту БКДП гаворыцца, што БКДП зацікаўлены ў дзейнасьці Yara International на беларускім рынку, бо кампанія ёсьць «узорам паводзінаў сацыяльна адказнай кампаніі», і апроч Yara «ніводная з замежных кампаній, якія працуюць у Беларусі, не кіруецца кодэксам этыкі бізнэсу і ня ставіць перад беларускімі партнэрамі ў якасьці безумоўных умоваў, неабходных для далейшага працягу супрацоўніцтва, захаваньне імі правоў чалавека і правоў працоўных».
Паводле БКДП, занятая кіраўніцтвам Yara пазыцыя на перамовах з адміністрацыямі «Беларуськалію» і Беларускай калійнай кампаніі ўжо «пачынае прыносіць свой плён»: кіраўніцтва «Беларуськалію» «вымушана заявіць пра гатоўнасьць прыняць экспэртаў па бясьпецы працы», працягваюцца «небеспасьпяховыя» перамовы аб аднаўленьні на працы ўдзельнікаў страйку, якія хочуць аднавіцца, таксама адміністрацыя пачала выплаты кампэнсацый страйкоўцам.
У БКДП перакананыя, што «альтэрнатывы прынцыповай пазыцыі Yara International няма», а «шальмаваньне кампаніі, аднясеньне яе да ліку памагатых кіроўнага беларускага рэжыму, ня толькі не адпавядае рэчаіснасьці, але і пераходзіць межы дазволенага». У заяве выканкам БКДП патрабуе спыніць «цкаваньне Yara International, маніпуляцыі грамадзкай думкай, уцягваньне ў кампанію па яе дыскрэдытацыі грамадзян краіны і замежных дыяспар» і прыносіць прабачэньні кіраўніцтву Yara.
Таксама ў заяве заклікаюць іншыя замежныя кампаніі, якія працуюць у Беларусі, «рушыць усьлед прыкладу Yara International і ўзяць за аснову сваёй прысутнасьці ў Беларусі кодэкс этыкі бізнэсу, зрабіць умовай працягу супрацоўніцтва зь беларускімі партнэрамі захаваньне імі правоў чалавека і правоў працоўных».
