«Пакуль не хвалюемся». У Мінгарвыканкаме расказалі, калі ў Мінску завершыцца ацяпляльны сезон
Пра гэта «Мінск-навінам» паведаміў намеснік старшыні Мінгарвыканкама Аляксандр Дараховіч.
«Мы кіруемся нарматыўнымі актамі, якія прадугледжваюць, што рашэнне аб завяршэнні асенне-зімовага перыяду мясцовыя выканаўчыя камітэты прымаюць пры ўсталяванні сярэднясутачнай тэмпературы, не ніжэйшай за +8 градусаў на працягу трох сутак запар. З практыкі, якая склалася ў апошнія гады, магу сказаць, што звычайна гэта адбываецца ў першай-другой дэкадзе красавіка».
Ён дадаў, што ў 2020 г. зрабілі выключэнне: у сувязі з першай хваляй кавіда ацяпляльны сезон быў працягнуты. Для жылых і адміністрацыйных будынкаў ён завяршыўся 8 мая, для школ, ВНУ і ўстаноў аховы здароўя — 26 мая.
«Сёлета мы будзем дзейнічаць у адпаведнасці з нарматыўнымі актамі і эпідэмічным становішчам.
Натуральна, улічваючы фактычнае надвор'е і яго прагноз, у найбліжэйшы час пытанне завяршэння ацяпляльнага сезона разглядаць не плануем, — сказаў А. Дараховіч.
